Shillong, Nohprah 29 : Ka Meghalaya BJP ha ka sngi Palei ka la pdiang burom ïa u Engineer barim ka MeECL, u Bah Allan K Suchiang ryngkat k nongkyrshan jong u ha ophis treikam jong ka BJP.
Ïa utei u rangbah uba la bat teng kum u Superintendent Engineer MeECL la pdiang burom da u State President ka BJP Bah Ernest Mawrie ryngkat ka jingdonlang u Myntri sorkar ka jylla ba dei ruh u MLA ka BJP na Shillong South, Bah Sanbor Shullai nalor kiwei kiwei ki nongïalam ka party.
U President ka Party haba kren ha ka jingïalang pdiang burom u la ong ba kane kadei ka dak ba ka BJP ka la nang kiew arshah katba nang ïaid ka por da ka jingwan pynïasoh jong ki riewpawkhmat bad ki riewrangbah sha ka party.
U kyntu ruh ïa ki nongtrei party ba kin pynjur ïa ka jingpynrung kyrteng ha kylleng ki jaka. Da kaba pynpaw ïa ka jingkmen ba ki ïoh ban pdiang burom ïa bun ki riewshemphang ha ka BJP, u President u la ong ba katei kan pyntikna ruh ïa ka jingpyntreikam bha ïa ki skim bad ki prokram jong ka Party.
Na ka liang u Bah Allan pat u la ïathuh ba naduh mynshwa u dei u nongkyrshan ka BJP bad dei na kane ka daw ba u thrang ban trei na ka bynta ka party kaba buh thong beit na ka bynta ban ai ka jingshakri bad ki kam pynroi.
