Shillong, Nohprah, 29: Ki shipai BSF jong ka 4th Battalion, Meghalaya Frontier ki la ïoh kurup ïa ki jaiñ kiba shongdor T.11 lak na khappud ka East Khasi Hills bad ka ri Bangladesh ïa kiba la kit ha kawei ka Trok pick-up shwa ban jam sha shiliang jong u pud u sam ka ri Bangladesh.
Katkum u kyrwoh, ha kawei pat ka jingjia ki shipai BSF jong ka 43 Battalion kiba la pynlong ka jingkhynra bad ki Pulit ka Meghalaya ha khappud ka South Garo Hills ki la ïohkem ïa uwei u nong Bangladesh uba la thmu ban rung be-aiñ sha u pud u sam jong ka ri India da ka jingthmu ban kit ïa ki mar khaïi tuh na India sha Bangladesh.
Ïa uba la shah kem la ithuh kyrteng kum u Md Asherul Hoque, 20 snem ka rta, na ka shnong Bhawanipur, Netrakona District, Bangladesh. Ki Pulit bad ki BSF ki la ïoh kurup ïa ki nep syaid, ki jingsleh pynbhabriew, ka kyiad bad kiwei kiwei de ki tiar.
Ki shipai BSF kiba ap pahara ha khappud ki la ïoh ban kurup ïa ki jaiñ bad ki jingsleh pynbhabriew kiba shongdor haduh 99 lak tang ha u bnai Nohprah, 2022.
