Shillong, Nohprah, 29: Ka Khun Hynñiewtrep National Awakening Movement (KHNAM) State Youth Wing ka la kynnoh ba ka Sorkar Meghalaya Democratic Alliance (MDA) ka la leh kuman halor ka jingdawa ban pyndam noh ïa ka Personal Interview ha ka jingthungkam ha ka Group, B, C bad D.
U kyrwoh ba la phah lyngba u President ka KHNAM Youth Wing u Bah Thomas Passah, u la pynpaw ba ka seng ka ladep phah da ka jingthoh sha ka sorkar jylla, ba ha ka jylla Meghalaya ruh dei ban pynduh noh ïa ka jingpynlong Personal Interview kumba la leh ha kiwei pat ki jylla ha ka Ri India.
“Ngi sngewsih ba ka Sorkar kam patiaw bad wat ki MLA bad ki seng saiñhima ha ka jylla ruh ki long kiba kyllut bad kiba matlah” la ong u Bah Passah.
Halor kane u la pynpaw ba ka seng kam banse ban shim da kiwei pat ki sienjam ban pynthikna ïa ka jingkhuid jingsuba ha ka thungkam thungjam.
