Shillong, Nohprah 29 : Ka Meghalaya BJP ha ka sngi Palei ka la pynbna ba kan ujor noh sha ka Election Commission jongka Ri pyrshah ïa ka jingkular ai jingïarap kyrshan pisa jong ka All India Trinamool Congress ïa ki longkmie jong kane ka jylla ïa kaba la tip kum ka We Card.
Na ka liang u President jong ka Meghalaya BJP haba kren bad ki lad pathai khubor u la ïathuh ba katkum ka jingtip jong ki, tad haduh ka 26tarik u Nohprah ki la don haduh kumba 96,000 ngut ki longkmie kiba la pynrung kyrteng ïalade ha katei ka WeCard ban ïoh ïa ka jingïarap pisa kaba long 1000 tyngka shibnai.
“Halor kane, ngi la rai ban ujor sha ka Election Commission jong ka Ri pyrshah ïa katei ka jingkular elekshon (election manifesto) jong ka AITC katkum ki kyndon elekshon kaba hap ban bud pyrkhing da kino kino ki political party katkum ka article 324,” u la ong.
Shuh shuh u ong ruh ba don ki kyndon jong ka MCC kaba la mana lypa ba ki political party kidei ban kiar na kaba pynmih kino kino ki jingkular kiba syriem kum ki jingpynbiej kiba lah ban ktah ïa ka hok longtrai ban pyndep ïa ka thong jied nongmihkhmat jong ki paidbah.
Da kaba kam ruh ba haduh mynta ym pat pynbna ïa ka elekshon ha ka jylla, u President ka BJP u la ong ruh ba ka TMC kam pat pynbna pura ïa ki mat ïakhun elekshon jong ka, kumta khlem pep katei ka skim ba ki pynbna kan dei kawei na ki mat ïakhun elekshon jong ki ha Meghalaya.
