Sei ka Congress 6 ki Engineer, 8 ki Master Degree bad Ph.D, uwei u doktor bad u Chairman barim ka GNLA

Shillong, Nohprah 29: Ka Indian National Congress (INC) ha ka sngi Palei, ka la pyllait ïa ka thup kyrteng ba nyngkong jong ki 40 ngut ki kyrtong kiba ka Pradesh Election Committee (PEC) jong ka Meghalaya Pradesh Congress Committee (MPCC) ka la phah sha Delhi ban ïoh jingmynjur ba kin mih aireng kum ki kyrtong ka Congress ha ka elekshon MLA kaban long ha u 2023.
Ki 40 ngut ki kyrtong kiba ka MPCC ka la mynjur ban phah sha Delhi ban ïoh jingmynjur na ka All India Congress Committee (AICC) ki kynthup haduh 6 ngut ki Engineer, 8 ngut kiba la pyndep ïa ka master degree bad Ph.D, uwei u doktor sumar briew bad kumjuh u Chairman barim ka Garo National Liberation Army (GNLA) u Champion R Sangma.
Shuh shuh ha kane ka thup ki kyrteng kiba la phah sha Delhi ki kynthup ïa u President ka MPCC uba long ruh u MP ka Shillong Parliamentary Constituency u Bah Vincent H Pala uban aireng na Sutnga-Saipung pyrshah ïa u MLA barim ka seng Congress u Ma Shitlang Pale uba la ryngkoh diengkper noh ha ka jingïalam u Dr Mukul Sangma sha ka AITC.
Ha kane ka thup kaba nyngkong ki don kumba 10 ngut ki MLA barim bad 7 ngut ki kyrtong Kynthei.
Haba kren sha ki lad pathai khubor, u President ka MPCC u Bah Vincent ula pyntip ba ki 40 ngut ki kyrtong ki kynthup ïa 26 ngut na Ri-lum Khasi bad Jaintia bad 14 ngut ki dei na Ri-lum Garo.
“Ngin sa shong jingïalang biang hadien shitaiew ban rai ïa ki 20 tylli ki constituency ba dang sah ba kynthup ïa 10 tylli ha Khasi Jaintia bad 10 tylli ha Ri-lum Garo” ula ong.
U la ïathuh ruh ba kine ki kyrteng kiba la pynlait kim pat dei ki kyrtong kiba la ïoh jingmynjur hynrei kidei kiba ka MPCC ka la phah sha Delhi ban ïoh jingmynjur ba kin long ki kyrtong ka party.
U la ong ruh ba ha kane ka thup ba nyngkong eh kiba ka party na ka jylla ka phah sha Delhi ki don haduh kumba 8 ngut na ki ki dei ki kynthei kaba kynjoh sha ka 20% na ki kyrtong
“Kine ki kyrtong kynthei kiba ngi pynbna ki dei kiba la nang la stad, kiba la don ka kyrdan kaba biang bha bad ruh ki long kiba trei shitom,” ong u Bah Vincent.
U la ong ruh ba ka jingdon haduh kumba 20% ki kyrtong kynthei ka dei kaei kaei kaba kum ka party ki sngew sarong namar ym pat don kiwei pat ki party kiba don kyrtong kynthei haduh katne percent.
U la ïathuh ruh ba ha kane ka thup ki don kumba 6 ngut ki Engineer, 8 ngut kiba la pyndep ïa ka master degree bad Ph.D bad uwei u doctor.
Ki don haduh 6 ngut ki MDC ba mynta ha kane ka thup kyrteng bad kine ki dei u Bah Pynshngaiñlang N Syiem (Pynthorumkhrah), Bah Ronnie V Lyngdoh (Mylliem), Batskhem Ryntathiang (Mairang), Gabriel Wahlang (Nongstoin), Charles Marngar (Mawhati) bad Carnes Sohshang (Mawkyrwat).
Ki kyrtong kiba la phah sha Delhi kiba la long teng ki MLA ki kynthup u Bah Pynshngaiñlang N Syiem (Pynthorumkhrah), Bah Ronnie V Lyngdoh (Mylliem), u Dr Celestine Lyngdoh (Umsning), J Antonius Lyngdoh (North Shillong), ka Deborah Marak (Williamnagar), Billykid A Sangma (North Tura), Edmund S Sangma (Rangsakona), Sayeedullah Nongrum (Mahendraganj), Rophul S Marak (Rongara-Siju) and Brigady Napak Marak (Bajengdoba) ki dei ki kyrtong kiba la long teng ki MLA sha ka Ïing Dorbar Thaw Aiñ ka jylla.
Ki kyrtong kynthei ha kane ka thup nalor ka Deborah, ki don 7 ba kynthup ïa ka Kong Rona Khymdeit kaba dei teng ruh ka MDC barim na Nongpoh, ka Kong Venetia Pearl Mawlong (South Shillong), Dr Banidashisha Kharkongngor (Nongthymmai), Lakyntiew Sohkhlet (Sohra), Pynhunlang Nongrum (Mawkynrew), Victorealness Syiemlieh (Ranikor) bad Uttora G Sangma (Ampati).
Lah ruh ban kdew ba u Champion R Sangma u Pulit barim uba la bat ïa ka kyrdan DSP uba la kieng atiar bad long ruh u Chairman ka kynhun lehnoh ha Ri-lum Garo ka GNLA un aireng pyrshah ïa u Dr Mukul Sangma u Myntri Rangbah barim ka jylla uba long ruh u Nongïalam ka liang Pyrshah ka Ïing Dorbar uba la mih khmat ïa ka Songsak ha kane ka kynti ba mynta.
Kiwei pat ki kyrtong ki dei u Ma Emlang Laloo (Nartiang), Nehemayah Tyngkan (Mokaïaw), Adrian Lambert Chyne Mylliem (Jirang), Marbud Dkhar (Mawlai), Manuel Badwar (East Shillong), Sardonik Nongkhlaw (Nongkrem), S Osborne Kharjana (Sohiong), Dannyson Kurbah (Mawphlang), Gopal Stone Hynniewta (Mawsynram), Nehru Suting (Pynursla), Goldenstar Nonglong (Rambrai-Jyrngam), Timjim K Momin (Mendipathar), Frederick Sangma (Raksamgre), Dr Kapin Ch Boro (Tikrikilla), Augustine D Marak (Dadenggre), Roger Benny A Sangma (Dalu), Karak R Sangma (Chokpot).