Shillong, Rymphang 18: Ka Shillong Lajong FC hynne ka sngi ka la wanphai biang ha ka lynti jingjop hadien ba ka la pynliem da 2-0 kol ïa ka Neroca FC ha ka lympung I-League kaba la long ha madan SSA Stadium, Shillong.
Ka namtam ka long sha u Kynsaibor Lhuid u ba la thep ïa baroh kitei ki 2 kol na bynta ka kynhun.
Ha ka jingïakhun, ka Lajong ka la lah ban tehlakam ïa ka bol naduh ba sdang hynrei kam shym la lah ban pynkhihjar haduh kaba kut jong ka kylla step.
Hynrei ha ka kylla kaba ar, u Kynsaibor Lhuid u la ïoh ban thep ïa ka kol kaba nyngkong ha ka 52 minit shuwa ba un thep ïa ka kol kaba ar ha ka 61 minit ban pynthikna ïa ki lai point na bynta ka kynhun.
Lyngba kane ka namjop ka Lajong ka la ïoh ban kyntiew ïalade sha ka kyrdan ba 5 ha ka miej da 22 point na ki 14 ïakhun.
Ka Lajong kan pynkhreh mynta sa ban aireng shabar nala ïing pyrshah ïa ka TRAU FC la sngi U Blei, ha ka 25 tarik Rymphang, bad ka por kan 7 baje janmiet ha Kalyani Stadium, Kolkata.
