Shillong, Rymphang 18: Ha ka jingïaidlynti ha kine ki 5 ba ladep, ka jylla ka la sakhi ïa ka jingnangroi stet ki jaka ïalehkai kiba la tei katkum ka jingdonkam ban ïoh pynlong ïa ki jait jingïalehkai bapher bapher, kum ka Wahiajer Multisport Complex ha Jaintia Hills bad ka Pa Togan Nengminja Sangma Athletic Stadium ha Garo Hills ki ba la biang nadong shadong, ha kaba la plie paidbah dang shen mynta u snem.
Shuh shuh, ka jingpyntri ban pynbha shuh ïa ka J.N. Stadium ha Shillong bad ruh ïa ka P.A. Sangma Sports complex ha Tura ka dang ïaid shaid shaid. Da ka jingpyntreikam ïa 4 tylli ki centre ba thymmai ha u snem ba ladep, ka la ïarap ban buh ïa ki Khelo India Centre ha man ki district ka jylla Meghalaya kiba khmih ïa ki jait jingïalehkai bapher bapher kiba kynthup ïa ka football, tennis, archery, athletics bad badminton.
Ka jylla ka la ïohruh ban pdiang pynlong ïa ki lympung kiba kham heh mynta u snem. Kaba kham hehduh na kine ka dei ka jingpynlong ïa ka 5th Meghalaya Games kaba la pynlong ha Tura ha ka sien ba nyngkong, da kaba lumlang palat 3,000 ngut ki nongïalehkai kiba ïashimbynta ha 22 tylli ki jait jingïalehkai (sporting discipline). Kiwei pat ki lympung ki kynthup ïa ka 6th Meghalaya Kayak Festival, 2nd Sohra International Half Marathon, ka 7th Elite Men’s National Boxing C’ship, 1st Meghalaya International Grandmaster Chess Tournament, bad ka 10th East Zonal Shooting C’ship. Nangta ka Chief Minister’s Under-12 Football Tournament bad ka Chief Minister’s Inter-School Athletic Meet ka la sakhi ïa ka jingwan ïashimbynta haduh 12,000 ngut kin khynnah na kylleng ka jylla.
lah ban kdew ruh ba ka jylla ka la kiew ruh ha ki kam ïalehkai, ka sakhi ka long hadien ba ka kynhun Meghalaya Under-18 Boy’s Football Team ka la jop takma ksiar ha ka Khelo India Youth Games 2023. Nangta ka kynhun Meghalaya phutbol ka jylla ka la wan ba ar ha ka 76th National Football Championship na bynta ka Hero Santosh Trophy ha u snem ba ladep.
