Sarong ka MSKA ba khur takma ki nongïalehkai na ka 3rd WAKO Indian Open International Kickboxing Tournament

Shillong, Rymphang 18: Ka Meghalaya State Kickboxing Association [MSKA], hynnin ka Sngi Saitjaiñ jong ka taïew ba ladep ka la pdiang burom ïa ki nongïalehkai Kickboxing ka jylla kiba la wanrah nam ym tang ïa ka thaiñ hynrei ïa ka ri hi baroh kawei hadien ba ki la khur takma na rynsan ïakhun jong ka 3rd WAKO Indian Open International Kickboxing Tournament 2024 kaba la pynlong ha nongbah New Delhi.
Kane ka lympung la pynlong hapoh Kd Jadhav Indoor Stadium, bad la sdang naduh 7 tarik mynta u Rymphang bad la khylliap noh ha ka 11 tarik Rymphang, 2024.
Napdeng ki 10 ngut ki nongïalehkai Kickboxing (kynthuplang Shynrang & Kynthei) kiba dei na ki kynhun bapher bapher, kum ka Team Revolution, Tribal Combat, Aireng MMA Club na Mawlai ba la phah da ka MSKA ban leit ïashimbynta sha katei ka rynsan ïakhun, phra ngut ki la wanphai ryngkat ki takma, kiba kynthup ïa lai tylli ki takma ksiar, ar tylli ki Rupa bad lai tylli ki Rnong.
Na ka liang jong ka synjuk MSKA ka la pynlong ïa ka prokram pdiang burom hapoh ka Hotel Assembly ha ka jingïadon ryngkatlang u President ka MSKA-u Bah Lorenzo P Warjri, nangta u Bah Sam Lyngdoh na ka Team Revolution lem bad ki khynnah ïalehkai kum shi bynta ban ai khublei bad ai mynsiem ïa ki ban dang ïai trei shitom ban pynjanai shuh shuh ïalade ha kane ka jingïalehkai.
Haba ai jingkren ha kane ka sngi, na ka liang jong u Bah Bah Lorenzo u la pynpaw, “Watla ka dei ka jingpyrshang kaba rit hynrei ka long kaei kaei kaba sngewtynnat namar ngi la lah ban wanrah haduh phra tylli ki takma”. U la bynrap ruh da kaba ong ba ki khynnah ha NorthEast, kynthup ïa ka Meghalaya khamtam ïa ka Manipur ruh, ki don ïa kata kaba ki ong ka “National Talents” ha ka Martial Arts.
“Phi la don lypa kata ka sap kaba u Blei u la ai ha phi, shim bad minot thop ha ka, bad lada phi donkam hok kan long ka jingkyrkhu na bynta jong phi,” la pynkut u Bah Lorenzo.
Na ka liang jong u Bah Sam Lyngdoh u la ong, “Nga tip ba ka jingïakhun ka long kaba eh, namar ka dei ka International Open, bun ki nongïalehkai ri ba nabar, kum na Uzbekistan, Turkey, Iraq bad kiwei kiwei ki wan ban ïashimbynta, bad ki nongïalehkai ki jong ngi ki hap ban pynkhreh bha ïalade. Te ka long kaei kaei kaba sngew sarong ïa ka ri bad ka jaitbynriew ba napdeng shiphew ngut kiba la phah da ka MSKA phra ngut ki la ïoh ban khur takma”.
Nalor kine ki nongïalehkai kiba la khur takma, ngi sngew sarong ruh ban pyntip ba u wei na ki samla ka thaiñ, u Shaiborlang Lyngdoh Mawphlang u la ïoh jingithuh haduh ka kyrdan International Referee, ban don bynta ha ka ban bishar ïa ki jingïalehkai, la bynrap u Bah Sam Lyngdoh.