Wan shim bynta ki nongkieng lieng ba paw na kylleng ki ri ka pyrthei

Sdang ka tamasa kieng lieng ‘Megha Kayak Festival 2022’ ba heh tam ha ka Ri ha Umtham Ri-Bhoi

0

Nongpoh, Risaw 13: Ka tamasa kieng lieng ‘Megha Kayak Festival 2022’ ba 4 sngi kaba dei kawei naki tamasa kieng lieng ba heh tam haka ri kala sdang mynta ka sngi haka shnong Umtham ha Ri-Bhoi District bala wan ruh ban shim bynta da ki spah ngut ki nongkieng lieng kynthup ïaki nongshim bynta ba paw na kylleng ki ri ka pyrthei kiba la shim bynta ruh haka Olympic bad kumjuh ruh ki nongshong shnong ka Umtham kiba la dep pyntbit ïalade bad shah hikai.
Ïa katei ka Megha Kayak Festival 2022 la pynlong da ka Ri-Bhoi Water Sports and Tourism Co-Operative Society Ltd. ha Wah Umtrew, Umtham Ri-Bhoi, da ka jingangnud ban pynlong ïaka jylla Meghalaya kum kawei naki jaka pynlong ïa katei ka jait jinglehkai, bad ban pynithuh sha ka pyrthei ba na ka jylla ruh ki don ki khynnah kiba don ïa katei ka sap ñiah lieng, bad lehse napdeng kitei kiba ïa shim bynta kin sa don ruh ki ban mih khmat sha kiwei ki lympung kiba heh haka ri bad wat shaduh Olympic.
Haba kren sha ki lad pathai khubor katto katne ki nongïalehkai bar ri kiba la shim bynta ha katei ka lympung kila pynpaw ka jingsngewkmen kaba khraw ban ioh iuhkjat ha jylla Meghalaya khamtam ban iohi ba ki don ki wah kiba ïahap dur ban pynlong ïa katei ka jait jinglehkai, bad kum ki nongïalehkai kiba la shang pyrthei ki iohi ba ka jylla Meghalaya ka dei kawei naki jaka ba bit ban pynlong kum kitei ki jait lympung.
Kila pynpaw ruh ba lyngba katei ka sngi ki sakhi ba wat ki nongïashim bynta naka jylla kiba don ruh wat ki heprit ba hapoh 15 snem ki don ka sap ban ñiah lieng, ha kaba kum ki rang bad thei ïalehkai kiba shim bynta wat haki Olympic ki iohi ba ki don ka lawei bad lehse ka sorkar kan kyntiew ïa katei ka jait jinglehkai sports haka jylla.
Naka liang ki nongïalam jong ka RWS&TCS Ltd ba kynthup ïa u Ian Vincent bad ka Sheela Vincent kila pynpaw baka thong bad ka jingangnud jong ki ban pynlong kum katei ka jait lympung ka long ban kyntiew ïa katei ka jait jinglehkai haka jylla kaba ym pat da paw pyrthei bha, bad bun naki samla kim pat da tip bha, ban pynpaw ruh sha ka pyrthei ba ka jylla Meghalaya ka dei ka jaka kaba tbit ban pynlong kum kitei ki jait lympung lyngba ka jingwan shim bynta da ki nongïalehkai bar ri naki ri bapher bapher ka pyrthei.
Kila pynpaw ruh ba katei ka tamasa ka dei lyngba ka jingkyrshan lang jong ka tnad jngohkai pyrthei jong ka jylla Meghalaya ban kyntiew ïaka kam jngohkai pyrthei lyngba katei ka kam ïalehkai ha kaba kum ki bor pynïaid ki don ruh ka jingangnud ban kyntiew ïaka sap jong ki nongshimbynta naka jylla ha katei ka lympung da kaba pynlong ïa katei ka jaka kum ka jaka ai jinghikai wat ïaki heprit kiba don ka sap kieng lieng, da kaba khot bad wer ruh ïaki paidbah ba kin wan ban sakhi ïa katei ka tamasa ban iohi ïaka sap kieng lieng haki um ba long kshaid ha wah Umtrew.

Leave A Reply

Your email address will not be published.