Mih ki samla pule ka Ri Bhoi College ban lum ïa ki jaboh na ki shnong ba hap ha Nongpoh Town

Nongpoh, Risaw 13: Kum shi bynta ban wan rah ïa ka khuid ka suba bad ruh ban pynurlong ïa ka thong jong ka sorkar India ban wan rah ïa ka khuid ka suba lyngba ka Clean India Campaign, ki samla Pule ka Ri Bhoi College lyngba ka National Service Scheme mynta ka sngi ki la mih paidbah ban pynkhuid ïa ki jaboh kiba don ha ki jaka paidbah ha ki shnong ba hap ha ka sor Nongpoh.
Palat spah ngut ki samla pule lyngba ka National Service Scheme, Ri Bhoi College ki la mih sha ki jaka paidbah ban lum ïa ki jaboh bad kynthup ruh ki plastic ba la bret pathar da ki paidbah kum ka thong ban pynlong ïa ki jaka paidbah hapoh ka sor Nongpoh ba kin long kiba khuid bad ba lait na ka jingbret pathar ïa ki jaboh.
Na ka liang ki samla pule ki la rah ïa ki byrni ban lum ïa baroh ki jaboh bad ki la ïa bhah ïa ka kam ram ha ki bynta bapher bapher ka sor Nongpoh na ka bynta ban lum bad pynkhuid ïa ki jaboh kiba la bret ha ki jaka paidbah bad da ka jingïashim bynta lang jong baroh ki samla pule ki la lah ban lum ïa ki jaboh ha ki bynta bapher bapher ka sor Nongpoh.
Haba la ioh ban ïa kren bad uwei na u Volunteer ka NSS, RI Bhoi College Unit, u Samla Rejoicing Suchiang, u la ong ba palat 300 ngut ki samla ki la shim bynta ha kane ka jingpynkhuid ïa ki jaka paidbah ha sor Nongpoh bad kum ki samla pule ki pynlong ruh ïa kane ka jingpynkhuid ïa ki jaka paidbah da kaba lum ïa ki jaboh ka long shi bynta ban pynsngewthuh ïa ki paidbah halor ka khuid ka suba.
“Kane ka jingmih ki samla pule ban lum ïa ki plastic, ki bitor plastic bad ki jaboh ka long ruh shi bynta na ka thong jong ka Clean India Campaign, ha kaba ka thong ka sorkar India ka long ban pynlong ïa baroh ki jaka jong ka India ba kin long kiba khuid bad ban kiar na ka jingbret pathar ïa ki jaboh sha ki jaka paidbah” ong u samla Rejoicing Suchiang bad bynrap ruh kane ka jinglah ban pynlong ïa kane ka jingpynkhuid ne lum ïa ki jaboh ha ki bynta jong ki shnong ba hap ha sor Nongpoh ka dei hi da ka jingïatrei lang ki samla pule lyngba ka NSS, Ri Bhoi College Unit, u la bynrap.
Shuh shuh, u la pynpaw ruh ba ki samla pule kka Ri Bhoi College ki khmih lynti ba da ka jingpynlong ïa kane ka jingpynkhuid ne lum ïa ki jaka ha ki jaka paidbah kan long ruh ka jingai jinghikai sha kiwei bad ki kyrmen skhem ruh ba ki paidbah kin sngewthuh kumno ban wan rah ïa ka khuid ka suba kumba la buh thong da ka sorkar India ban pynlong ïa ka ri jongngi, kawei na ka ri kaba khuid bad kaba lait na ka jingbret pathar ïa ki jaboh.