Shillong, Nohprah 05 : Ka Nongïalam ka NPP bad Myntri Sorkar Kong Ampareen Lyngdoh ha ka sngi Palei, kala kyntu bad ïawer ïa ki dkhot ka seng Hynniewtrep National Liberation Council (HNLC) ba kin wan rung noh sha ka jylli saiñ pyrthei bad pynsngew ïa la ki jong ki jingsngew na ki rynsan ba dei ban pynsngew ha ka jaka ban shu hukum na khlaw.
Ka la kynthoh ïa kane halor ka jingkynnoh ba dang shen jong ka HNLC ba ka NPP kala kylla long ka atiar ïa ki Garo ban pynïaid ïa ka jylla haba buh hakhmat ïa ki lai tylli ki mat jingdawa ba kynthup ïa ka rukom treikam ban bujli ïa ki Myntri Rangbah ka Jylla khnang ban pynthikna ïa ka jingïoh long nongïalam ba mar kumjuh na baroh ki jaidbynriew ha Jylla.
“Ngan ym sngap satia ïa katto katne ki hukum donbor kiba wan na khlaw. Em, phi wan shakhmat bad ïakren bad ngi” ong ka Kong Ampareen haba ïakren bad ki lad pathai khubor.
“Sngewbha ïakhun ïa ka elekshon. Wan ha ka kyrdan kaba phi lah ban pynsngew ïala ki jong ki jingsngew. Nga mut, kaei kane ka jinghukum? Ngam sngewthuh kaei kaba ki mut. Ngam pat ïohi dalade ïa ka jingkren jong ki hynrei phim lah ban ïai long ka kynhun ba narieh narieh na ka por sha ka por” kala ong.
Ka Myntri kala bynrap “Wan sha madan, ym don ba khang ïa phi ban ïakhun ïa kano kano ka elekshon lane phi don ka jingïasngewthuh jingmut bad kiwei ki seng saiñ pyrthei. Kaei kata ka seng saiñ pyrthei kaba phi kyrshan? Pyntip sha ngi. Lada long kaba lah ban ïathuh beit beit sha ki paidbah ba ka kynhun x,y.z ka kwah ban ïasoh bad ka kynhun x,y,z”.
Haba pynpaw ba ka jingdon MLA ka NPP kala kiew sha ka 32 ngut ha ka ïing Dorbar ba 60 ngut, ka kong Ampareen ka la ong “…phi donkam ïa u nombor ha ka ïing Dorbar Thaw Aiñ, bad mynta ngi don ïa u nombor uba biang. Ki paidbah kila klet ba ngi don uwei u MLA na West, MLA na Ri-Bhoi. Ka NPP kala don 32 ngut hato ngim dei shuh ki Khasi?. Nga mut, kaei kane ka kam kai”.
Haba kyrpad ban kiar na ka jingmut jingpyrkhat ba sngew ïapher Jaidbynriew, ka Kong Ampareen kala ong “Wat pynrung ïa ka jingmut jingpyrkhat ïapher Jaidbynriew. Ngi hap ban ïatylli ban ïakhun pyrshah ïa ki nongthombor. Wat ïuhroit ïa ngi bad nang pynïapait ïapra ïa ngi. Nga sngew skhem, ka NPP ka dei ka party ba treikam ha baroh kawei ka Jylla Meghalaya, kaba kdup ïa baroh ki niam. Ngim don jingshah liang ïano ïano ruh. Ngi shakri ïa ki paidbah ka Jylla. Ngi burom ïa baroh ki niam, baroh ki jaidbynriew”.
