Shillong, Jymmang 16 : Ki Nongialam jongka seng Hynniewtrep National Liberation Council (HNLC) mynta ka sngi ki la wan poi ha kane ka nongbah Shillong na ka bynta ban sdang noh ïa ka jingkren ïasuk.
Ki don saw ngut ki nongïalam kiba la wan ban mihkhmat ïa ka seng HNLC bad mynta hi ka sngi ki la ïa kynduh ruh ïa u Symbud Myntri Rangbah bah Prestone Tynsong.
Ha ka 2 tarik u Nailar jong u snem ba la dep ka seng HNLC ka la phah ïa u Vice Chairman bad ïa u Foreign Secretary jongka ban wan ïashim bynta ha kane ka jingkren ïasuk kaba don lang ki nongmihkhmat na ka liang ka sorkar pdeng bad ka sorkar jylla.
Dang ha ka 8 tarik mynta u bnai u Myntri Rangbah u la ong ba ka jingiakren ïapynbeit bad ka HNLC ka dang ïaid shakhmat. Don bun kiei kiei kiba dang ïa kren ïa pynbeit bad ka seng HNLC bad baroh ki long kiba seisoh ong u myntri rangbah.
Dang ha u bnai Iaiong mynta u snem ka seng HNLC lyngba u President ka HNYF uba dei u ksiang na ka liang jongka HNLC u la pynpaw ba ka seng ka buh ki kyndon da kaba pynpaw ba ym lah ban ong ba ka jingïakren ka long khlem kino kino ki kyndon namar ki don lypa ki kyndon kiba ka seng ka ïeng nongrim naduh kaba sdang.
