Ngi dang ap ïa ka kaiphod la ka dei neem ka jingshisha ba la pynkhie im ïa ka GNLA: DGP
Yn lum jingïalang u CM halor ka khubor khie im biang ka GNLA
Shillong, Jymmang 16: U Director General of Police (DGP) ka jylla u Dr LR Bishnoi u la ong ba na ka liang ka tnat pulit ka dang ap ïa ka kaiphot na ki SP jong ki District ban pynshisha la ka dei ka jingshisha ba ka seng lehnoh Garo National Liberation Army (GNLA) la pynkhie im biang bad ba ka don ka jingshah ai jinghikai kumba 500 ngut ki dkhot jong ka sha Mayanmar.
Ha ka jingïakren sha ki lad pathai khubor u Dr Bishnoi u la ïathuh ba kane ka jingtip kaba ki tnat syntiat ki la ai bad ka ong ba ka dei tang ka jingpyntip ba la ai, ‘haduh katno ka dei kaba shisha ngin dang ap ïa ka kaiphot na ki SP hynrei kumba long mynta ngim pat lah ban pynshisha eiei,’ u la ong.
“Ngi ju ïoh bun ki jingtip na ki tnat synstiat hynrei ngim katba ym pat lah ban pynshisha ngim lah ban ong eiei bad kaba ïadei bad kane ka jingïoh jingtip na ki tnat ruh ka dei kaba ngin hap ban pynshisha shuwa,” u la ong.
U Myntri Rangbah ka Jylla Conrad K Sangma hynne ka sngi Ba-ar ula ong ba un sa lum ïa ka jingïalang ban shong bishar ba haduh katno kane ka khubor ka long kaba shisha ne ka bym shisha.
Lah ban kdew hangne ba ka internal memo jong u Heh Pulit DySP ka West Garo Hills ka la lait tuh bad paw ha ki kor social media ba ki ehrang ka GNLA kynthup ïa kiba shah kem bad kiba pyndem wait, ki la pyrshang ban pynkhie im biang ïa ka GNLA haba pyntip ba haduh 500 ngut ki samla ki la rung sha kane ka kynhun kiengatiar bad ïa kine la phah sha Nagaland bad Myanmar (Burma) ba kin ïoh ïa ki jinghikai pyntbit ha kaban pyndonkam ïa ki tiar siat.
U Conrad ula pyntip ba ula ïoh ïa ka kaiphod napoh ka Sorkar hynrei u khlem pat ïoh lad ban khmih bniah ïa ka. Ula bynrap ba ka Sorkar kam shym la shim sting ïa kane ka kam.
“Ngi da sngewkhia jur ïa kane ka kam hynrei ngam mut ban ong ba ngi sngewkhia ha ka jingmut ba ngi khuslai hynrei phi dei ban sngewthuh ba kum ka Sorkar ngi la ïoh ïa shibun ki khubor bad haba ki wan, ngi hap ban pynshong nongrim bha ba haduh katno ka long kaba dei ne kaba lait” ong u Conrad.
Ula batai ba ki don ki khep ba ka Sorkar ka la ioh pdiang haduh 100-200 tylli ki khubor ha kaba tang 2-3 tylli ki dei kiba don ka nongrim. Ka long kaba eh ban ong eiei ïa mynta khlem da ïoh khmih shuwa ïa ka kaiphod hynrei kum ka Sorkar hi ngi khlem shim sting ïa ka kam.