Shillong, Jymmang 16: U Bah Synshar Lyngdoh, MLA ba thymmai ka Sohiong, u la bam smai mynta ka sngi, ka 16 tarik u Jymmang 2023. La pynbam smai ia u da u Deputy Speaker, u Timothy Shira, ha kaba la iadon lang u President jong ka UDP, u Bah Metbah Lyngdoh, ki Myntri sorkar, ki MLA bad kiwei kiwei de. Lah babn kdew hangne ba u Bah Synshar u la jop ïa ka elekshon Sohiong kaba la pynjlan sha ka 10 tarik u Jymmang na ka 27 tarik u Rymphang 2023 namar ka jingkhlad noh u Bah HDR Lyngdoh, uba long u Kñi jong u.
Haba iakren bad ki nongthoh khubor hadien ba ladep smai, u Bah Synshar ba la ju khot ieit ruh u Pope u la ong ba un trei na ka bynta ka roi ka par jong ka Constituency bad kumjuh ruh un kren ïa ki mat kiba ktah ia ka jylla hi baroh kawei. U la ong ba ka jingjop jong u kan long ka jingsdang ïa ka lynnong ba thymmai ïa ka jingtreikam ha Sohïong Constituency ha kaba un trei shitom na ka bynta ka roi ka par bad kiwei kiwei de ki jingdonkam ha ka Constituency. U Bah Synshar u la pynpaw biang kumba u la kren ha kine ki sngi baladep ba haba u rung ha Assembly kam dei ïa u ba un shu leit shong, hynrei un leit ban kren ïa ki jingeh jong ki paidbah bad jong ka ri bad jaidbynriew.
