17 tarik ka Cabinet, 18 tarik ka MDA bad 19 tarik ka All Party Meeting

Sdang ki jingiatai ïathir bad ïamir jingmut halor ka Roster

0

Shillong, Jymmang 16 : U Myntri Rangbah ka Jylla Conrad K Sangma mynta ka sngi Ba-ar, ula pyntip ba ka Sorkar Jylla ka la shim khia bha halor ka Roster System bad ki jingïatai ïathir bad ïamir jingmut halor kane ka kam kan sdang naduh lashai ka sngi ha kaba u la khot ïa ka jingïalang jong ka Kynhun Myntri ha ka por 3 baje janmiet.
U pyntip ba hadien kane, ka Sorkar kan sa pynlong ïa ka jingïalang jong ka kynhun synrop Meghalaya Democratic Alliance (MDA) ka ban long ha ka 18 tarik Jymmang bad yn pynbud da ka jingïalang jong baroh ki seng saiñ pyrthei (All Party Meeting) ha ka 19 tarik Jymmang.
“Ka Sorkar ka la pynkhreh ïa ki jingbatai kiba bniah bha halor ka Roster System bad shisien ba baroh ki la ïohi ïa kane ka jingbatai, nga thikna ba ki jingartatien baroh kin sa jah noh” ong u Conrad haba ïakren bad ki nongthoh khubor.
U Conrad ula pyntip ruh ba ka Sorkar Jylla kan sa khot ïa ki kynhun Sengbhalang ban ai ïa kane ka jingbatai ba bniah ha ka taiew ka ban wan. Kane ka kynhun kan kynthup ïa ki Sengbhalang, ki Nongialam jong ki seng niam, ki Rangbah Shnong bad ki kynhun bapher bapher jong ka imlang sahlang.
“Ngi don jingmut ban ïakren bad baroh halor kaei ka jingmut jong ka Roster. Ka jingeh hi ka long ba bun ki briew kim pat sngewthuh kaei ka Roster ne ka mut aiu. Ka dei kaba jyrwit jyrwat bha, hynrei kaba suk pat ban sngewthuh. Ka long kaba eh hynrei nga thikna ba shisien ba ki la ïoh ïa ka jingbatai, kin sa hun” ong u Conrad.

Leave A Reply

Your email address will not be published.