Shillong, Jymmang 18 : Ka Seng Khasi College kaba don hapdeng ka jingrakhe ïa ka Golden Jubilee ka jong ka, ka la lah pat ha kaban pynlong sa ïa ka Inter School Invitational Futsal Competition na ka bynta ki khynnah shynrang.
Ïa kane ka jingïakob la pynlong ïa ka ha madan Weiking, bad ïa ka pyrda jong kane ka lympung la plie ïa ka hynne ka sngi ka 18 tarik u Jymmang, da u Principal jong ka kolej u Bah W.B Rynjah ryngkat ka jingïadon lang ki nonnghikai jong ka kolej, ki nonghikai na ki skul ba la wan ban ïashim bynta sha kane ka jingïakob bad ki khynnah skul.
Haba phai sha ki resol na ka jingïakhun ha ka sngi ba nyngkong ka Pearly Dew Hr. Sec. School ka la lah ba kan pynliem noh ïa ka St Dominic Higher Secondasry School da 1-0, ha ka jingïalehkai kaba ar ka Christian Academy Hr. Sec. School ka la lah ba kan pynliem noh ïa ka Seng Khasi Higher Secondary School da 3-2, katba ki khynnah ka Seng Khasi College ki la lah ban pynliem ïa ka Government Boy’s Higher Secondary School da 4-1 bad ka resol na ka jingïalehkai ba khatduh jong ka sngi ka long ba Mawlai Presbyterian Higher Secondary ka la lah ba kan pynliem noh ïa ka Sacred Heart Hr. Sec. School da 6-3.
Ka jingïakhun ïa ki semifinal bad final jong kane ka jingïakob la buh ban long pat lashai ka sngi ka 19 tarik Jymmang 2023.
Ka jingïakhun ïa ka semifinal ka long ba ka Pearly Dew kan iakhun pyrshah ïa ka Seng Khasi College bud pat sa ka jingïakhun hapdeng ka Christian Academy pyrshah ïa ka Mawlai Presbyterian HSS.
