Shillong, Jymmang 18 : Ka kynhun ïalehkai jong ka Rangdajied Utd FC ka a khur jingjop da kaba pynliem da 6-0 kol pyrshah ïa ka Seiñpynbhalang SC ha ka jingïakhun jong ka lympung ïalehkai phutbol ba la tip kum ka Meghalaya State League (MSL) 2023 (Jowai Zone) kaba la long ha ka sngi Palei ha madan Kiang Nangbah Stadium, Jowai.
Katba ka jingïalehkai na ka Group A kaba dei jong ka Shillong Zone, ka Jyntru FC bad ka Umrit SC ki la ïakhaid noh da kaba ïathep mar shi kol ha ka jingïalehkai ha madan Third Ground jong ka MFA. Ha ka jingïalehkai na ka Group D ha Tura, ka Selsella Sports Association ka la khur jingjop da kaba pynliem da 3-1 pyrshah ïa ka Warima Youth Club ha Chandmari Ground.
Ïa kitei ki kol na ka Rangdajied UTD FC la thep da u nyngkong da u Bansanbha Khongsdam ar kol ha ka minit ba 19 & 74, u Tremiki Lamurong ar kol haka minit ba 75 & 76, katba u Basuklang Bina bad u Wanlamsuk Nongkhlaw kila ïoh ban thep mar shikol ha ka mninit ba 63 bad ka minit ba 90+2.
Ka jingïalehkai hapdeng ka Jyntru bad Umrit, u Badaminot Nongphlang u la thep na bynta ka Jyntru bad u Donald Nongtri u la thep ïa ka kol pynïakhaid na ka bynta ka Umrit. Ha ka jingïalehkai ha Tura, ka Selsella Sports Association ka la thep nyngkong lyngba u Benjamin Marak hashuwa ba ka Warima YC ka ïoh ban pynïakhaid ha ka minit ba 50 lyngba u Charlie R Marak uba la thep lyngba ka penalty.
Ka Selsella Sports Association ka la ïoh ban thep sa ïa ki ar kol lyngba u pynphai kylla lyngba u Walseng Sangma ha ka minit ba 64 bad 66.
Ki jingïalehkai mynta ka sngi Thohdieng, na ka Group A, kaba dei ka Shillong Zone, ka Mawlai SC pyrshah ïa ka Langsning FC ha ka por 3 baje janmiet, ka Group B, Jowai – ka Niaw Wasa United pyrshah ïa ka Mulait United ha ka por 2:30 nohphai sngi, ha ka Group C, Mawkyrwat – ka Riangdo YSCA pyrshah ïa ka Seven United, ha ka por 3 baje janmiet bad ha ka Group D, Tura – ka Wasa FC pyrshah ïa ka Atong Matgrik FC ha ka por 3 baje janmiet.
