Wan phai biang ka khlam COVID-19 ha jylla kem pang 13 ngut

0

Shillong, Iaiong 14 : Ka Jylla Meghalaya ka la sakhi biang ïa ka jingwanphai jong ka khlam Covid-19 namar kat haduh mynta ka sngi ki la don 13 ngut ki nongpang ne active case ha ka Jylla baroh kawei.
ïa kane la pyntip da u Health Secretary ka Jylla Ram Kumar uba la pynpaw ba kane ka khlam ka lah ban dang ïai kiew ha ki sngi ban dang wan. Une u Ophisar ula pyntip ba ka Sorkar Jylla ka la pynkhreh lada jia ba kane ka khlam ka saphriang hapoh ka Jylla.
Kat kum ka jingïathuh jong u, tang mynta ka Sngi Thohdieng, ki don lai ngut kiba la ïoh ïa kane ka jingpang bad arngut ki la ïoh pat ïa ka jingkoit hynrei kaba sngewtynnad ka long ba ym shym la don satia kiba poi shah sumar ha hospital.
U Ram Kumar ula pyntip ba ïa ki Covid ward ha ki hospital la donkam ban hap pynkhreh biang haba donkam ban ai jingsumar ïa ki nongpang.
U Ram Kumar u ong ba ka Sorkar Jylla kan sa shong bishar ïa ka jinglong jingman hashuwa ban pynmih ïa kano kano ka jingbthah ïa ki paidbah ba kin bud ïa ki kyndon jingbthah jong ka Covid-19.
Ula ong ruh ba ka Tnad ka koit ka khiah kan sa pynkhlaiñ biang ïa ka jingdon ki nongtrei da kaba thungkam biang ïa ki briew lyngba ka contract lada dawa ka jinglong jingman.

Leave A Reply

Your email address will not be published.