Jowai, Ïaïong 14: Ka Khasi Student Union (KSU) West Jaiñtia Hills District Unit, kala pynrem jur ïa ka sorkar MDA-2 halor ka jingieh lyngkrang ïa ka surok Jowai By-Pass, kaba don hajan Mihmyntdu ban mih sha Thalaskeiñ kaba la sniew sha ba palat kaba la buh jingeh bad jingma ïa ki paidbah nongleit nongwan lynba kane ka u surok bah.
Na ka liang ka seng mynta ka sngi haka jingïalam u General Secretary u samla Leningrad Tariang bad u Finance Secretary samla Phrangki Papang bad katto katne ki dkhot kila leit ban jurip ïa une u surok ban ïohi dala ki jong ki khmat.
Na ka liang kitei nongïalam ka seng kila ong ba kane ka jingjot jong kane ka surok, kala buh jingeh ïa kiba buh ki kali kiba dei ban ïaid lynba kane ka surok bad tang na ka daw jong ka jingsniew palat katei ka bye pass, ki kali kila hap ban ïaid noh lyngba ka surok na sor Jowai bad kane ka la wanrah ka jingdheng kali kaba jur shuh shuh ha sor Jowai.
Halor kane ka jingeh ki paidbah nongleit nongwan ka seng ka la kyntu jur ïa ka NHAI ne ka PWD ban maramot kloi noh ïa kane ka surok katba lah, kat bym pat jia kano kano ka jingjia ba sngewsih, sa kawei ruh kane ka By-pass ka dei u budlum jong ka roi ka par, ka kamai kajih bad kaba pynsuk ïa ki nongleit nongwan khamtam ha ka pang ka shitom.
Ka seng ka la ong ruh ba lada ka sorkar kam shimkhia ïa kane ka kam, ka seng kam banse ban shim da kiwei pat ki sien jam.
