Shillong, Naitung 18: Ka Meghalaya Chess Association (M.C.A) ka la dap da ka jingsngew sarong hadien ba arngut ki nongïalehkai ka jylla ki la ïoh ban kyrdan ba hakhmat ha rynsan lehkai Chess kaba la tip ruh da ka 5th Ayodhana International FIDE Rating Chess Tournament 2023 kaba la long ha Guwahati, Assam .
Ha kane ka jingïalehkai Chess ki la don haduh 333 ngut ki nongïalehkai kiba la wan ban ïashimbynta, u Barbith M. Sangma, u ba dei u lahduh jong ka jylla ba mynta (State Champion) jong ka Garo Hills u la ïoh ban wan ha ka kyrdan ba lai ha ka thup kyrdan Below-1800 Rating katba u Advitiya A. G a u khynnah skul napoh ka Army Public School, Shillong u la ïoh ban wanram nam ïa ka jylla da kaba jop ha ka kyrdan ba nyngkong na ka thup kyrdan Under-07 Category.
Shuh shuh, la ïoh jingtip ruh ba kine baroh arngut kin sa ïoh ban ïashimbynta sa ha ka 46th Meghalaya State A Chess Championship 2023 ka ban sa pynlong ha Auditorium Hall, Umsning, Ri-Bhoi District ka ban sdang naduh ka 21 haduh ka 22 tarik mynta u bnai (Naitung) 2023 kaba la pynïaid da ka Ri-Bhoi District Chess Association RBDCA).
Na kane ka lympung ka synjuk kan sa ïoh ban jied ïa ki saw ngut ki nongïalehkai kiba wan kham shakhmat (Top 4) ban leit mihkhmat ïa ka jylla ha rynsan ïakop kaba khamheh, ïa kaba la tip da ka 60th National Chess Championship 2023 ka ban sa long ha Pune, Maharashtra, ka ban sdang naduh ka 16 tarik haduh ka 26 tarik u Nailar 2023.
