Wadlad ka Sorkar Jylla ban siew tista ïa ka tulop jong ki nonghikai skul SSA

Shillong, Lber, 15: Ka Sorkar Jylla ka la kular ban wad ïa ki lad ki lynti na ka bynta ban siew tista ïa ka tulop jong ki nonghikai skul SSA ha ka jylla.
Ïa kane ka jingkular la shim ha ka jingïalang ba la pynïaid da u Symbud Myntri Rangbah ka Jylla u Bah Prestone Tynsong ha ryngkat ka jingsakhi lang jong u Myntri ka tnat Pule Puthi u Rakkam A. Sangma bad ka kynhun jong ka Meghalaya Sarva Shiksha Abhiyan Schools Association (MSSASA) kaba la long ha ka sngi Balang.
U Sangma ha ka jingïakren bad ki lad pathai khubor u la ïathuh ba ha ka jingïalang la ïathir sani halor ki mat kiba la wanrah da ka Association kiba kynthup ïa ka jingsiew tista ïa ka tulop bad ka jingsiew ïa ka Arrear ba dang sahteng.
“Ngi la ïathuh ïa ki ba ngi la trei ïa ka kam (ban weng ïa kine ki jingeh),” u la ong.
Haba kylli, u Sangma u la ong ba ka tulop ba dang sahteng ka long tang na ka bynta ar bnai namarba ka Sorkar ka ladep siew dep ïa ka tulop haduh u bnai Nohprah, jong u snem baladep.
“Ngi dang ap ïa ka Ministry ba dei peit ban pyllait ïa ka pisa na ka Second Installment hapoh 15 sngi,” u la bynrap.
Katkum ka jingong jong u, ka Sorkar Jylla ka la leh ïa la ka jong ka kamram bad mynta ka dang ap ïa ka Ministry ban pyllait ïa ka pisa.
Shwa kane, u President jong ka MSSASA u Bah Aristotle C. Rymbai u la ïathuh ba ka Association ka la kyrpad ïa ka Sorkar Jylla ban mang kham bun ka pisa ha ka Mang Tyngka na ka bynta ki skul SSA ha ka Financial Year ba mynta jong u snem 2023-24 khnang ba kan ym don ka jingdkoh ha kaba siew tulop sha ki nonghikai skul SSA.
U la ong ba kane ka jingkyrpad ka long namarba manla ka khep, ki nonghikai ki hap ban mih sha surok ban dawa ïa ka tulop jong ki. U la ai nuksa ruh ïa ka jingjia ha u snem baladep ha kaba ki nonghikai kim banse ban thiah miet ha surok ban dawa ïa la ka hok.
“Namarkata, ngi sngew ba ka por ka la donkam ïa ka Sorkar Jylla ban kham mang pisa kham bun ïa ki skul SSA khnang ba kine ki jingeh kin ym mih shuh hadien habud,” u la bynrap.
U Bah Rymbai u la ong ba u Symbud Myntri Rangbah bad u Myntri ka tnat Pule Puthi ki la ai ïa ka jingkular ban shimkhia halor kane ka jingpynsngew jong ka Association.
“Ki la ïathuh ïa ngi ba ka Sorkar ka la wadlad ban mang kham bun ka pisa ha ka Mang Tyngka jong ka Jylla khnang ba lada ka pisa ka poi slem na ka Sorkar Pdeng, ka Sorkar Jylla kan nang lah ban siew la kumno kumno ïa ka tulop jong ki nonghikai skul SSA na ka bynta 3 bnai na ka pisa ba la mang lypa da ka Sorkar,” u la ong.
Ha kaba ïadei bad ka jingpyndap ïa ki kam nonghikai ba thylli ha ki SSA Lower bad Upper Primary School ha ka jylla, u Bah Rymbai u la ong, “ngi ladep ïakren ïa kane ka bynta bad ki la pyntip sha ngi bad dei na kata ka daw ba ka Sorkar haduh mynta kam shym la ai jingmynjur ïa ka jingtyrwa ba la phah da ki School Managing Committee (SMC) na ka bynta ban pynbna paidbah ïa ki kam ba thylli namarba kin hap ban pynshisha shwa ïa ki nonghikai.”
“Hynrei, ha kum kane ka por, ki la kynduh jingeh pynban. Ka jingeh ka long ba ki don katto katne ki SMC ki bym mynjur ban pdiang ïa kito ki nonghikai lane ban shim ïa ki nonghikai na ki skul bad ban thung ïa ki sha kiwei pat ki skul kiba kham bun ki khynnah skul. Ka Sorkar mynta ka dang leh ïa ka kamram da kaba pyrshang ban weng noh ïa kane ka jingeh,” u la bynra.
U la ïathuh shuh shuh ba u Symbud Myntri Rangbah bad u Myntri ka tnat Pule Puthi ki la kyrpad ïa ka Association ban ïaishah shipor bad ban ïatreilang bad ka Sorkar tad haduh ba kan da ïapynbeit ïa kane jingeh bad ki SMC.
Ha kaba ïadei bad ka jingsiew ïa ka tulop jong ki nonghikai skul na ka Account jong ki District Mission Coordinator, u President jong ka MSSASA u la ong ba u Symbud Myntri Rangbah u la ïathuh ba ha ka 19 tarik Nohprah, jong u snem baladep u State Project Director u la pynmih da ka jingthoh sha baroh ki District Mission Coordinator bad la bthah ruh sha manla ki SMC ba kin phah ïa ki jingai jingtip kiba bniah jong ki nonghikai bad ïa ki Bank Account. Ïa ka shithi pynkynmaw la phah biang ha ka 16 tarik, Kyllalyngkot, 2022.
“Kane ka bynta ka dang ïaid shakhmat. Shen, ka tnat ba dei peit kan sa pyndep lut ïa ki jingdonkam baroh khnang ba ka jingsiew ïa ka tulop jong ki nonghikai skul SSA na ka Account jong ki District Mission Coordinator kan poi beit beit sha ka Account jong ki nonghikai skul,” u la ong.
Ka MSSASA ka la kyntu ruh ïa ka Sorkar Jylla ban pynstet noh ha kaba ïadei bad ka jingthung ïa u Chairman bad ïa ki dkhot jong ka Meghalaya State Education Commission. Ka Sorkar Jylla ka ladep thaw ïa ka Search Committee ba la khlieh da u Chief Secretary.
“Mynta, u Symbud Myntri Rangbah bad u Myntri ka tnat Pule Puthi ki la pyntip ïa ngi ba ka Search Committee ka ladep shong jingïalang ruh shisien. Shen kin sa shong ïa ka jingïalang kaba ar bad ban shim rai mano ban shimti ïa ka kam Chairman bad ban thung ïa ki dkhot jong ka Education Commission,” u la ong.
“Ha u bnai Naitung, jong u snem baladep ha ka jingpynlong ïa ka jingïakhih, u Symbud Myntri Rangbah u la khot ïakren ïa ngi bad ha ka jingïalang ngi la rai da kawei ka sur halor ki ar tylli ki mat – ban pynkiew ïa ka tulop bad ban ithuh noh ïa ki nonghikai skul SSA ïa kiba yn sa shimkhia da ka Meghalaya State Education Commission. Ka por ka la donkam ïa ka Sorkar ban thung noh ïa u Chairman bad ïa ki dkhot jong ka Commission khnang ba ngin dup lah ban pynsngew ïa ki jingeh jong ngi hakhmat ka Commission,” la ïathuh shuh shuh u Bah Rymbai.