Shillong, Naitung 07 : Ka Sorkar Jylla ka la wad jingtip bniah mynta ïa ki buit kumno ban lah pynmih ïa ka bording elektrik na ki niut bad ki jaboh jabaiñ.
U Myntri kam pynmih bording u Abu Taher Mondal haba ïakren bad ki nongthoh khubor ula ïathuh ba u Myntri Rangbah ka Jylla u Conrad K Sangma u dang ïakren mynta bad ka National Thermal Power Corporation (NTPC) halor kane ka kam.
“U Myntri Rangbah ula ïakren bad ka NTPC namar ka NTPC ka don ïa katto katne ki project ba pynmih bording na ki niut. Namar kata, ngi ruh ngin pyrshang ban wad ïa ki buit” ula ong.
U Myntri ula pyntip ruh ka jingïakren ka la ïaid halor ka jingwad ïa ki lad ki lynti ban pyndonkam ïa ki jaboh jabaiñ sha ka jingpynmih bording elektrik.
“Ngin sa shong jingïalang bad ka Tnad Urban Affairs ruh ban ïakren ïa kane ka kam” ula ong haba bynrap “Mynta ka sngi ngin sa ïakren ruh halor kane ka bynta bad na kata ka daw nga ong ha phi ba halor kane ka bynta, lehse ngi lah ban leh eiei”.
U Myntri Rangbah dang ha kine ki khyndiat sngi, ula pyntip ba ka Jylla ka donkam haduh 1700 million unit ka bording manla u snem ha kaba ka Jylla ka dang lah ban pynmih tang 1000 haduh 1100 million unit…na kata ka daw, ka la don ka jingduna ka bording kumba 600-700 million unit.
“Ia kane ka jingduna la pyndap da ka bhah ba ïoh na ki central agency bad kaba duna pat lah shu thied na ïew. Namar kata, kane ka dei ka jinglong jingman ba mynta” ula ong.
