Rah i Heprit Ellery Kharkongor ïa ka khusnam lahduh ha ka Sur Kynud Niam

Shillong, Naitung, 07: I Heprit Ellery Kharkongor na Nongthymmai i la long i lahduh ha ka jingïakob rwai ba pynlong da ka Don Bosco Media Network kaba la ai kyrteng da ka Sur Kynud Niam, ïa kaba la pynhap pyrda noh ha ka sngi Thohdieng ha Don Bosco Youth Centre, Shillong.
Ki don 13 ngut ki nongïashim bynta kiba la poi sha ka Grand Finale na ki phew ngut kiba la ïashim bynta naduh ba sdang. Kumta, da kane ka namjop i heprit Ellery i la ïoh ban khur ïa ka song pisa kaba T. 35,000 hajar ryngkat ka khusnam sahkynmaw.
Ïa ka khusnam kaba ar pat la ïoh ban rah da u samla Khampher Mawlong na Mawmaram ryngkat ka buskit T. 15 hajar , katba ïa ka khusnam kaba lai la ïoh ban rah da i heprit Ïamonlang Wahlang na Mawmai, Sohra ryngkat ka buskit T. 5 hajar tyngka.
Ïa kane ka jingïakob rwai, la pynhap pyrda da u Archbishop jong ka Shillong Archdiocese, u Most Rev. Victor Lyngdoh, ryngkat ka jingsakhi lang jong u Vicar General u Rev. Fr. Richard Majaw, u Provincial jong ka Salesian Province Shillong u Fr. Paul O. Lyngkot, kumjuh u Fr. Jivan Lakra uba long u Rector ka Don Bosco Technical School nalor ka jingdonlang ki Brother bad ka jingsakhi lang ki kmie ki kpa bad ki bahaiing jong ki nongïashim bynta.
Ka Don Bosco Media Network ha kane ka janmiet ka la sam ruh ïa ka khusnam ba kyrpang kaba la tip kum ka Shillong Province Youth Icon Award sha ka samla Wanrida Pyngrope. Hadien kane pat ka la don sa ka jingaiti ïa ka DBMN Youtube Channel Silver Creator Award sha u Proprietor ba dei ruh u Provincial da u Fr. Richard Majaw Vicar General.
Shwa kane na ka liang u Fr. Paul lem bad u Vicar General ki la ai ka jingïaroh ïa ka Don Bosco Media Network hapoh ka jingïalam u Fr. Michael Makri kiba la lah ban pynlong ïa ka jingïakob rwai niam kaba long kum ka rynsan na ka bynta ki Heprit ban pynpaw ïa ka sap ba ki don.