Shillong, Naitung, 07: Ka Hynñiewtrep Youths Council (HYC) East Jaiñtia Hills District Unint ka la pynpaw bad kren shai katba ka Sorkar kam pat lah ban wanrah da ki aiñ, ban tehlakam ïa ka jingrung kyrthep jong ki poiwir, kum ka ILP lane kat bym pat ïoh ïa ka ILP ka aiñ ka ban ïada ïa ka jaidbynriew na ka jingshah tyllep noh na ki mynder kan nym pdiang ïa ka lynti Rel.
“Ka Seng ka buh ha khmat ïa ka jing ïada ba paka ïa ka jaidbynriew bad ha ka jingsngewthuh jong ngi lada wan ka lynti Rel kan pynsuk ïa ki poiwir ban wan buhai shnong ha ka Bri u Hynñiewtrep lada ngim don ïa ki aiñ ïada ba biang, kum ka ILP,” ong u kyrwoh ba la phah da u President ka HYC East Jaiñtia Hills District Unit, u Bah Presios Pale.
“Ha kaba ïadei ba ka jingkyntiew ïa ki lynti ïaid (Transportation), ka Seng ka ai jingmut ïa ka Sorkar India bad ïa ka Sorkar Meghalaya ba ki dei ban shna noh da ka surok saw laiñ (Four lane ) naduh Ratachera shaduh Umïam (Damsite) khang ba kan pynsuk ban kit ïa ki mar ki mata bad ïa ki briew kiba leit jingleit,” ong ka seng.
“Ka Seng ka kyntu ïa baroh ki MLA, ki MDC, ïa ki Daloi , ki Waheh chong, ki Sengbhalang bad ïa ki paidbah ka rilum Jaiñtia ba ngin ieng tylli lang kawei ban pyrshah ïa ka lynti Rel kat bym pat ïoh ïa ka ILP. Ngi dawa ïa ka Sorkar India bad ïa ka Sorkar Meghalaya ba kin pyntreikam noh ïa ka ILP kaba dei ka lad jingïada ïa ka jaidbynriew Hynniewtrep jong ngi,” ong shuh shuh u kyrwoh.
