Wat lapmiet ha ki kam bym phoida ong ka Myntri ïa ka VPP halor ka Reservation Policy

Shillong, Naitung 07 : Ka Myntri Sorkar ba khlieh ïa ka Committee ki seng saiñ pyrthei ka Kong Ampareen Lyngdoh mynta ka sngi Thohdieng, ka la kyntu ïa ka Voice of the People Party (VPP) ban ym lapmiet ban pynlut kai ïa ka por ha ki kam bym phoida haba phai sha ka kam ba ïadei bad ka State Reservation Policy.
Ka Myntri kala kynthoh ïa kane halor ka jingkren jong ka VPP halor ka jingkyrpad jong ka Committee sha baroh ki seng saiñ pyrthei ba kin phah ïa ki jingshem bad jingai jingmut ba ïadei bad ka State Reservation Policy ïa ka ban sa pynshong nongrim ha kaban thung ïa ki dkhot jong ka Expert Committee.
Ka Chairperson jong ka Committee kala ong ba ka VPP ka lah ban phah ïa ki jingshem bad jingai jingmut jong ka sha ka Ophis u Myntri Rangbah ka Jylla, ka Ophis jong ka bad sha ka Tnad Aiñ haba bynrap ba ïa kane ka kam lah dep ruh ban ïakren ha ka jingïalang ba khatduh ba la pynlong da ka Committee bad baroh ki seng saiñ pyrthei.
“Kam don satia kano kano kaba ngi ong kaba dang dei ba thymmai..namar kata ynnai pynbunkam ha ki kam bym phoida namar lada phi shu pynbunkam ïalade ha ki kam bym don jingmyntoi, phin ym ïoh ia kaei ka jingthmu” ong ka Kong Ampareen.
“Ki lah ban nym ithuh ïa ka Committee ki seng saiñ pyrthei kaba nga khlieh, ka biang hi, ka shong ha ki ban sngewthuh ba lada kim ithuh ïa ngi, ngim don jingwit satia hynrei ngi dei kiba la ïohbor bad kane ka dei ha ka kyndon treikam” ka la bynrap.
Ka kong Ampareen kala ong ruh “Ka biang hi, lada kawei ka seng saiñ pyrthei kam kwah ban aiti ïaki jingai jingmut. Sngewbha phi phah noh sha ka Ophis u Myntri Rangbah namar lada phi kwah ba ka kam kan sdang noh ngi hap ban sdang da kano kano ka kam. Kane ka dei ka mat kaba nga mut”.