Une u dei u para khatduh jong u Prestone bad Conrad, ong u Bah Prestone ha Weilyngkut

Shillong, Ïaiong 22 : U National Vice President jong ka NPP ba dei ruh u Symbud Myntri Rangbah ka jylla, Bah Prestone Tynsong ha ka sngi Saitjaiñ u la ong ba u Bah Samlin Malngiang ba dei ruh u kyrtong ka party ha kane ka elekshon ban wan ha Sohiong ba u dei u para khatduh jong u Bah Prestone bad Conrad K Sangma.
Ïa kane, u Bah Prestone u la kren ha ka jingïalang ïalap elekshon na ka bynta utei u kyrtong kaba long ha Weilyngkut. Lah ban kdew hangne ba ka jingjied ïa u MLA ba thymmai na bynta katei ka constituency kan long ha ka 10tarik u Jymmang mynta u snem. Baroh ki la don haduh 6 ngut ki kyrtong kiba aireng kynthup naduh ka UDP, BJP, HSPDP, Congress, TMC bad ruh na ka NPP kaba ïalam ïa ka sorkar.
Na ka liang u Bah Prestone u la ong, “Une uba long kum u para khatduh jong u Prestone bad Conrad Sangma, un don ha syndah jongngi.” Shuh shuh u ong ruh ba ki khmih lynti ba hadien ka 13tarik u Jymmang ki kyrmen ba kin sa ïoh sa uwei pat u MLA ban long 27 ngut.
Ha kajuh ka por, u Bah Prestone u la kyntu ruh ïa kiwei pat ki party kiba ïakhun ïa ka elekshon ha Sohiong ba kidei ban kren beit ïa ka jingshisha ym ban shu kynnoh da kumne kumtai pyrshah ïa ka party NPP. “Ynnai ïalam bakla ïa ki paidbah namar ïa ka sorkar ngi la dep ban thaw ha ka 07tarik uneu bnai ba lai bad ngi la pyntyllun ïa ki kam jong ka roi ka pa bad kumjuh ruh ngi la dep ban mynjur ïa ka mangtyngka,” u la bynrap shuh shuh.