Jowai, Ïaïong 21: Ka kynhun ïalehkai kriket jong ka Ribhoi District CA kala jop da kaba suk haduh 171 ron ïa ka Eastern West Khasi Hills District CA, ha kawei na ki jingïalehkai jong ka lympung Under-16 Boys Inter District Cricket Tournament 2025 (Zone-1) kaba la long ha ka sngi Nyngkong 21 tarik u Ïaïong.
Ïa kane ka lympung la pynlong da ka Meghalaya Cricket Association (MCA) ïa kaba la pynïaid daka West Jaiñtia Hills District Cricket Association (WJDCA) ha Madan Thad, Mukhla Mission, kaba ha West Jaiñtia Hills District.
Haba phai sha ka jingïalehkai ha katei ka sngi hapdeng ka Ribhoi District CA pyrshah ïa ka ka Eastern West Khasi Hills District CA. Ïa ka jingkynting pisa (toss) la jop da ka Ribhoi District CA kaba la kam trai ban tied nyngkong. Ka Ribhoi District CA haba wan ban tied nyngkong kala lah ban kamai 226 ron na ki 50 ober bad khyllem 9 wiket.
U Anmol Shah ula long uba seisoh tam ban lamkhmnat napdeng ki nongtied da kaba kamai 61 ron marwei na ki 71 bol kiba u la bynrap na ki 10 tylli ki Fours (4s). Katba na ka liang jong u Manbhalang L Marshillong (C) pat u la tied 48 ron na ki 84 bol ryngkat bad 7 tylli ki Fours (4s).
Haba phai sha ki rangkawang bol ka liang pyrshah (Eastern West Khasi Hills District CA), u Dabetbhalang Kharjana u la khur marwei 3 wiket na ki 12 ober.
Haba wan tied ban beh ïa ka thong, ki nongtied ka Eastern West Khasi Hills District CA kim shym la lah ban shan ïaka jingtbit jong ki nongkawang ball jong ka Ribhoi District CA bad ki la kyllon uwei hadien uwei khlem da kynjoh wat tang ïa ka spah ron, ha kaba baroh ki la khyllem noh tang na bynta 55 ronna ki 21 ober.
U Anmol Shah uba ïoh bun run tam na ka Ribhoi District CA ula seisoh ruh ha ka bowling da kaba ïoh ban pynhap 5 wiket na ki 2 overs bad kane kala pynlong ïa u ban ïoh ïa ka nam Man of the Match.
Ka jingïalehkai mynta ka sngi 22-04-2025 kan long hapdeng ka South West Khasi Hills District CA pyrshah ïaka West Khasi Hills District CA naduh ka por 8 baje shiteng mynstep.
