Mawkyrwat, Ïaïong 21: Ka Mawlangwir Sports Club ka la long ka lahduh hadien ba ka la pynliem noh pyrshah ïa ka Kuchaphrang Football Club ha ka lympung ïalehkai kynjatbol phainal ba la tip kum ka 1st Division Football League 2024-25 ba la pynïaid da ka Mawkyrwat District Sports Association (MDSA) ha madan Artificial Turf, MDSA, Nonglang, South West Khasi Hills District.
Haba phai ha ka jingïalehkai, kaba dei ha ka kyllastep ki ‘rangïalehkai jong baroh ar tylli ki kynhun kata ka Kuchaphrang Football Club bad ka Mawlangwir Sports Club ki la don hapdeng ka jingïakhun kaba tyngeh bha hynrei tat haduh ba kut ki minit jong ka kine baroh ar kim shym la ïoh ka lad ban ïa pynkhih jar wat kawei ruh.
Haba wan phai pat ha ka jingïalehkai jong ka kyllamiet, da ka jingïakhun kaba tyngeh bha ka Mawlangwir Sports Club ka la ïoh ban thep 1 kol lyngba u Fairbornson Lyngdoh ha ka minit kaba 65, ha kaba lyngba kane ka shi kol ka Mawlangwir Sports Club ka la rah ïa ka nam lahduh da kaba ka la pynliem noh da 1 – 0 kol pyrshah ïa ka Kuchaphrang Football Club.
U kongsan ha kane ka sngi u dei u bah Carness Sohshang, MDC barim jong ka Mawkyrwat Constituency ha ryngkat ka jingdonlang ki nongkitkam ka Mawkyrwat District Sports Association (MDSA) bad kumjuh ki nongkyrshan jong baroh ar tylli ki kynhun.
