Shillong, ïaïong 21: Ka All Meghalaya Karate-Do Association [AMKA] ha ka sngi Nyngkong (21 tarik ïaïong, 2025) ka la pynlong ïa ka Intensive Karate Kumite Training Camp 2025 kaba shi taïew ha kaba u Coach u Pranay Sharma u la wan ai ka jinghikai ïa kumba 80 ngut kiba ïashim bynta ha kane ka prokram.
Kane ka jingai jinghikai ka long na ka bynta ka jingpynkhreh ïa ka National Games ka ban long ha u snem 2027 ha Meghalaya. Haba ai jingkren ha kane ka sngi u Pranay Sharma uba la jop ruh haduh 7 sien kum u lahduh jong ka ri, bad uba la jop takma ksiar ha ka Commonwealth, South Asian, WKF Series A and Khelo India, u la ong ba kane ka jingïalehkai kam dei tang ban pyndep hynrei kan dei ban long ka thong ka ban pynpoi sha ki kliar lum jong ka nam.
U la ong ba ka Karate kam dei tang ka jingïalehkai hynrei ka dei ban hap ban tip shibun bad na ka liang jong u, u la ong ba ka thong jong u ka long ban sam ïa ki jingnang jingtip bad ki buit, ki sap halor kane ka jingïalehkai.
Kiba la don ryngkat ha kane ka sngi plie ïa ka prokram ai jinghikai ki long u Assistant Rangbah Shnong ka Mawkhar bad u President ka Mawkhar SC u Mr Ransom Sutnga bad ki dkhot ba rangbah jong ka AMKA.
Haba ai jingkren na ka liang jong u Assistant Rangbah Shnong ka Mawkhar u la pdiang sngewbha ïa baroh bad ai mynsiem ïa ki nongïashim bynta bad u la pynpaw ïa ka jingngeit ba baroh na kine kin sa wanrah ka burom ïa ka jylla namar ka jingthmu jong kane ka jingai jinghikai ka long ban pynkhreh bad u kyrmen ruh ba ka 39th National Games ka ban long ha Meghalaya kan long kaba jop.
Na ka liang jong u, u la noh synñiang T. 10 hajar sha ka AMKA na ka bynta ba kan lah pyntyllun ïa ki kam jong ka.
Hadien ka jingïalang kaba lyngkot, ka la don ka jingkilan met ba la lamkhmat da u Pranay, na ka liang ki shipai Indian Army Karate bad kumjuh ruh na kiwei kiwei. La pynïaid ïa ka jingïalang da u Bah Ksan Kupar Warjri Secretary AMKA ha ka jingdonlang u Banshanlang Kharumnuid Vice President bad kiwei kiwei ki nongkitkam nalor kiba la shah khot sngewbha.
Kane ka prokram ka long ka jingthmu kaba kongsan ban kyntiew ïa ka jingïalehkai karate ha ka jylla, kane prokram ai jinghikai, kaba la pynlong ha Mawkhar Dorbar Shnong Community Hall, kan neh haduh ka 26 tarik ïaïong. Palat 60 ngut ki khynnah samla bad ki nongïalehkai karate ba la kham tbit na ka jylla Meghalaya kiba la wan ïashim bynta.
