Ujor ki nongïalehkai Meghalaya Games ha Tura ba ïoh slem ka bam sngi

Shillong, K’lyngkot 15: Ka Meghalaya Games kaba 5 kaba la long ha Tura kumba la long kiwei ki Meghalaya Games ha ki snem baladep, mynta ka snem ruh kam lait na ki kynrum kynram, wat lada wan plie ïa ka jingïalehkai mynta u snem da ka President jong ka ri, ka Droupadi Murmu.
Kiba bun ki kmie ki kpa jong ki nongïalehkai kiba leit ïashim bynta mynta ka snem, ki la ïathuh ba ki khun jong ki, ki la pyntip sha ki (ki kmie ki kpa) ba ka rukom pynbiang ïa ka bam kam biang satia ha kaba mynta ka sngi, ki don kiba la ujor ba kim shym la ïoh bam satia naduh ba ki poi ha Stadium ha ka por 9 baje mynstep, hynrei ki dang ïoh haduh ka por 5 naje janmiet.
“Ki khun ki la phone ïa nga ba kim shym la ïoh bam satia baroh shisngi, hynrei ki dang ïoh haduh ka por 5 baje janmiet, kata ruh tang da u Singara, u Chips bad ki nut”, la ïathuh u kpa jong kawei ka Samla kaba leit iashim bynta ha kane ka lympung ïalehkai kaba la sdang mynta ka sngi ha Tura.
Ki don ruh kiba la phone ba kiba mih ha Shillong myn Sngisaitjaiñ ha ka por 7 baje janmiet bad ki leit da ka Bus na Guwahati. Kine ki la ïathuh ba ki shu ïa bam jingbam ha Nongpoh bad ki la poi ha Tura ha ka Sngi U Blei mynstep. Tangba baroh shilynter lynti kim shym la bam jingbam eiei shuh tad haduh ban da poi ha Tura. Kaei kaba la pyndom eh ïa kine ki Samla ka long ba wat ynda haba la poi ha Tura ruh ki dang ïoh bam haduh ka por janmiet.
“Ngim tip la ki khun jong ngi, kin lah ne em ban dang ïalehkai haba kim ïoh bam kumne?’, la ong i Kmie jong uwei ki Samla ba leit ïashim bynta ha kane ka lympung ïalehkai.
Hynrei ki don ki Samla kiba la poi naduh kine ki sngi baladep ban leit ïashim bynta ha ka Phutbol ki la ïathuh ba ki la poi ha Stadium naduh ka por 9 baje mynstep bad ki ïoh bam ja sngi haduh ka por 3 baje janmiet. Ki la ïathuh ba ki don kiba ïh ja khyndiat bad ka pylleng, hynrei ki don ruh kibaïoh tang da u Singara bad u Chips bad umsoh Frooti.
Halor kane ka jingjia ïa ki khun ki kti, ki don ki kmie ki kpa kiba la byrngem ba lada jia ba kane ka jingbymbiang ka bam ka ïai bteng, kim banse ban leit shaw noh ïa ki khun jong ki na Tura.
“Ngi phah ïa ki khun jong ngi ban leit ïashim bynta ha ka Meghalaya Games, ngi khlem phah ba kin leit shah thngan sha Tura”, la ong katto katne ki kmie ki kpa, kiba la ong ruh ba lada ïa ki nongïalehkai ym lah ban pynbiang, yn khmih lynti shano ban kiew kata ka jingïalehkai.
Na ka liang ki nongkitkam ka Meghalaya State Olympic Association, ki la kubur ba ka don ka jingslem ha kaba sam bam sha ki nongïalehkai. Ka daw kaba ki ai ka long ba dei namar ka jingwan ka President ha kaba ka don ka jingpyrkhing bad ka jingkhang ïa ki kali ban ïaid, kumta ka bam ka poi slem. Nalorlata ki la ong ruh ba ki la buh da ka por ban sam bam. Lehse kiba ïoh bam slem ki lah ban dei kiba poi kham hadien.