Shillong, K’Lyngkot 16 : Ka kynhun ïalehkai jong ka Laitkor SC ka la ïoh ban pynliem da 2-0 kol ïa ka Mylliem ha ka lympung ïalehkai jong ka SSA 1st Division Football League 2023-24 kaba long hynne ka sngi ha madan SSA, Polo.
Haba phai sha ka jingïakhun, u Risuklang Malngiang u la ïoh ban pynkhih jar nyngkong na bynta ka kynhun ha ka minit kaba 23 jong ka kylla step. Na ka liang ka Mylliem watla ka pyrshang borbah ban pynphai ïa ka kol ba ka shah lamkhmat kam shym la lah satia tad haduh ban da kut ka kylla step.
Ka jingïakhun ha ka kylla miet ka la nang itynnad shuh shuh hadien ba baroh arliang ki la ïakhun tyngeh ban ïoh thep kol.
Hynrei dei ha ka minit kaba 72 ba ka Laitkor ka la ïoh biang sa shi kol lyngba u Giovanni Syiemiong kaba pynlong artad ïa ka kynhun ban ïoh lamkhmat da ki ar kol.
Kumta tad haduh ban da kut ka por ïalehkai ka Mylliem kam shym lah shuh ban pynphai wat tang shi kol ruh bad kumta ka la mad ïa ka jingshah rem ha katei ka sngi.
