Dawa tuklar ka HANM ïa ka President ban pyntreikam ia ka ILP bad ithuh ïa ka ktien Khasi & Garo
Shillong, Kyllalyngkot 5 : Ka Hynniewtrep Achik National Movement (HANM) ka la dawa tuklar ïa ka President jongka ri India ka Droupadi Murmu na ka bynta ban bthah ïa ka sorkar pdeng ba kan pyntreikam noh ïa ka Inner Line Permit (ILP) bad ban pynrung ïa ka Ktien Khasi bad Garo ha ka Khyrnit ba Phra jongka Riti Synshar ka ri kumjuh ruh ban pynbeit noh mar mar ïa u pud u sam hapdeng ka Meghalaya bad Assam.
Ha ka dorkhast ba la ai biang sha ka President ka HANM ka pynpaw “Ngi ai biang ïa kane ka dorkhast kum ka jingpynkynmaw ïaphi bad kyrpad ïa phi ba phin shim khia ïa kitei ki mat kiba donkam ban ïada ïa ki jaidbynriew riewlum ritpaid ha Meghalaya ban lait shah tyllep ha kiwei pat ki jaidbynriew.
Ka HANM ka pynpaw ba ka sorkar pdeng ka dei ban pyntreikam ïa kane ka aiñ Eastern Bengal Frontier Regulation Act 1873 ha Meghalaya kumba ka la leh ne pyntreikam ha Arunachal Pradesh, Nagaland, Manipur bad Mizoram. Lada ka sorkar pdeng ka sngap ïa ka jingdawa jong kiwei ki jaidbynriew jong kiwei ki jylla kane ka thaiñ ka dei ruh ban sngap bad pyntreikam ïa kane ka aiñ ha Meghalaya khnang ba ka jaidbynriew kan don jingshngaiñ.
Ka HANM ka ong “ Ki paid Khasi bad Garo ki long tang shitroh lada ïa nujor bad kiwei ki jaidbynriew riewlum jong kane ka thaiñ ruh bad ki don la ka jong ka ktien ka thylliej bad ki dak thoh dak tar kiba la pyndonkam ha ki skul ki kolej bad haduh ki skul bah kata shaduh ki kyrdan Ph.D ruh. Ban ïada ïa ka ka ktien Khasi bad Garo ka Seng ka ai jingkyrshan pura ruh ïaka Resolution ba la mynjur hapoh ka ïing dorbar Assembly jongka jylla ban dawa ithuh ïa kine ki ktien da kaba pynrung ha ka Khyrnit ba Phra.
Haba ïaroh ïa ka jingpyrshang jong u Myntri Rangbah ka jylla bad u Myntri Rangbah ka Assam ban pynbeit ïa u pud u sam da kaba la ïasoi ruh ïa ka MOU ha ka 29 tarik Lber 2022 hakhmat u Myntri Kam Pohïing ka ri u Amit Shah. Ka seng ka la ong pat “Hynrei phi tip shai pat ba ka jingïasoi MoU da ki ar Myntri Rangbah jong kine ki ar jylla kan ym lah ban treikam lada ka sorkar pdeng kam shim khia ban pynbeit ïa u pud u sam namar kane ka kam ka dei ka kam jongka sorkar pdeng”.