Ujor ka VPP sha ka DCA ba khang ki Dorbar Shnong ban pynlong jingïalang paidbah

Shillong, K’lyngkot 28 : Ka Voice of the People Party (VPP) ha ka sngi Ba-ar, kala dawa ïa ka Tnad District Council Affairs (DCA) ba kan pynmih ïa ki jingbthah ba kyllum ïa baroh ki Rangbah Shnong ba kin kiar na kaba shim ïa kano kano ka rai ka ban ktah ïa ka jingpynïaid ïa ka elekshon kaba laitluid bad ka bym ïashah liang.
Ha ka shithi sha u Commissioner & Secretary ka Tnad DCA, u General Secretary bad MP ka VPP u Dr Ricky AJ Syngkon ula kynnoh ba ka rai jong ki katto katne ki Rangbah Shnong/Sordar Shnong kala pynduh lad ïa ka VPP bad ïa ki kyrtong jong ka ban pynlong ïa ki Jingïalang paidbah (public meeting) ban ïalap elekshon.
Kane ka jingujor kala mih ruh tang hadien katto katne sngi, hadien ba ka Mawlai Town Dorbar lem bad ki kyrtong, kila mynjur ban nym pynlong ïa ka elekshon MDC ban wan kum ka tamasa, ban pynlong ïa ki jingïalap elekshon tang da ki Common Platform ha baroh ki Shnong ka Mawlai ym shuh da ki jingïalang paidbah (public meeting).
Ka Mawlai Town Dorbar kala shim ïa kane ka rai ha ka jingïadonlang u kyrtong ka VPP ban aireng na Mawlai bad kiwei kiwei ki kyrtong.
ïa kane ka rai la pynshong nongrim halor ka jingud jingnam jong ki Kmie Kpa, namar ba ki Khun ki Kti jong ki, ki dang don hapdeng ki eksamin bapher bapher jong ka Meghalaya Board of School Education (MBoSE).
“Kumta, nga kwah ban kyrpad ia phi ban sngewbha pynmih ïa ka jingbthah ba kyllum ïa baroh ki Rangbah Shnong ba kin kiar na kaba shim ïa kum kane ka sienjam kaba ktah ïa ka jingpynlong ïa ka elekshon kaba laitluid bad bym shah liang bad ban pynsuk ïa ki seng saiñ pyrthei bad kyrpang ba kin pynlong ïa ki jingïalang da kaba ai ïa ki NoC hapoh ka por kaba biang hadien ba ki ïohpdiang ïa ki aplikeshon la ka dei hapdeng ka jingtreikam ka Model Code of Conduct ne kiwei kiwei” ula ong.
Une u MP ula ong ba kila don ki khep ba ki kyrtong ka VPP kila ïakynduh ïa ka jingeh ban ïoh jingbit ha ka ban pynlong ïa ki jingïalang paidbah/ialap elekshon na ka Ophis ki Rangbah Shnong ka Ri-lum Khasi bad Jaintia.
“Ki don ki khep ba kim ai ïa ki jingbit bala pan lane ai ynda la dier kaba la ktah ïa ka jingïalap elekshon jong ngi. La ju mad ruh da ki kyrtong jong ki ba ki don ki Dorbar Shnong kiba khang ban pynlong ïa ki jingïalang paidbah lait noh tang ki Common Platform ba ki pynïaid ma ki. Kine ki kam jong ki katto katne ki Dorbar Shnong ki la ktah bha ïa ka hok tynrai bala pruid dak ha ka Riti Synshar ka Ri” ula ong ha ka shithi.