Mih noh u heh Working President UDP Sohïong shwa ka elekshon MDC

Shillong, K’Lyngkot 28 : U Working President jong ka UDP Sohiong ba bat ruh ïa ka kam Secretary jong ka UDP Youth Wing na East Khasi Hills kumjuh ïa ka kam Chief Adviser jong ka UDP Youth Wing Sohiong, Bah Bankynsai Thabah u la resaiñ noh na ka kam kaba u bat ha ka party bad ruh na ka jinglong dkhot naduh ka 27tarik mynta u bnai.
Ha ka shithi ba u phah sha u President jong ka UDP East Khasi Hills Youth Wing nangta sha u President jong ka UDP Sohiong Circle bad kumjuh sha u President/Secretary ka UDP Youth Wing Sohiong, na ka liang u Bah Bankynsai Thabah u la ong ba ka jingresaiñ noh jong u na kitei ki kam ba la kdew haneng kadei na ki daw shimet.
Lah ban kdew hangne ba ka jingresain jong u Bah Bankynsai na ka party ka dei ruh sa tang kumba lai taiew ei ei shwa ka sngi thep vote na bynta ka elekshon MDC kaban long ha ka 21tarik u Rymphang mynta u snem.
Haba ïa kren bad une u rangbah um pat treh ban kren ei ei kaei pat ka sienjam ba un shim hadien ba u la resain noh na ka party.