Pan ka Committee u Katakey ïa ka kaiphod halor u dewïong na ka CAC
Bthah ban pan 400 klur tyngka na ki karkhana dewbilat

Shillong, K’lyngkot 28 : Ka Committee u Justice BP Kataker (Retired) ba thung da ka ïing Bishar High Court jong ka jylla ka la bthah ïa ka Coal Audit Committee ban aiti noh ïa ka kaiphod kaba bniah hapoh ka artaiew haba ïadei bad ka thymmei u dewiong ba ïoh pyndonkam da ki karkhana.
Haba pynskhem ïa ki jingbthah bala leit, u Justice Katakey ula ban jur ïa ka jingdonkam ban leh ïa ka audit kaba bniah bha halor ka thymmei jong u dewiong ba pyndonkam da ki karkhana coke, ki karkhana saiñ nar bad ki karkhana dewbilat ban pynmih bording.
Ha ka kaiphod u snem 2020 ba ula aiti sha ka National Green Tribunal (NGT) Committee, la pynpaw ba katto katne ki karkhana dewbilat kila shu thied ïa u dewiong beaiñ khlem da ïaid kat kum ki kyndon aiñ.
Ula bthah ba dei ban phah siew ïa ka pisa ba kot T.400 klur na kine ki kompani, ka kam kaba dang sahteng ha ka jingbishar ka NGT Committee bad kaba dang ïaid mukotduma hapoh ka ïing Bishar Supreme Court.
U Justice Katakey ula mynjur ïa ka jingïaid ka kam leh audit ïa u dewiong, haba buh jingthoh ba katto katne ki karkhana coke kila kubur ba ki thied ïa u dewiong da ki lynti ba beaiñ bad mynjur ban siew ïa ka GST ba dei ban siew.
Hynrei katto katne ki karkhana dewbilat kila pan por ban aiti ïa ki jubab jong ki. Ka Coal Audit Committee kala ai notice bad dawa ban aiti da ki kot ki sla ban pynshisha ïa ki jingkam jong ki.