Thep kyrteng u Bah Kimfa bad u samla Lurshai na Rambrai Jyrngam

Nongstoiñ, K’lyngkot 28: Ha ka sngi ba ar jong ka taiew, ar ngut ki kyrtong MDC na Rambrai Jyrngam Constituency ki la leit ban thep kyrteng ïalade hakhmat u bah V.Swer MCS Additional Deputy Commissioner Returning officer jong ka 28 Rambrai Jyrngam District Council Constituency, kaba la long ha DC ophis Nongstoiñ.
Kitei ki ar ngut ki kynthup ïa u samla Lurshai Kharbani kyrtong shimet u ban ïakhun kum u kyrtong MDC na ka Rambrai Jyrngam Constituency bad u bah Kimfa Sidney Marbaniang kyrtong MDC na ka seng National Peoples Party.
Ïa u bah Kimfa la synran lang da ka kurim jong u ryngkat ki khun bad kiwei kiwei ki nongkyrshan ba radbah kynthup ïa u bah B.I. Nongsiej bah P.B.Marngar bad kiwei kiwei.
Katba ïa u samla Lurshai la synranlang ïa u da u R.G.Momin MLA ka Rambrai Jyrngam Constituency bad ki paidbah kiba dei ki nongkyrshan jong utei u kyrtong MDC shimet.