Kynduh ka FKJGP ïa ka DSEO Ri Bhoi ba don ki skul bakyntait ai TC ïa ki khynnah

Nongpoh, Kyllalyngkot 28: Na ka daw ka jingdon ki katto katne ki skul ha Ri Bhoi kiba kyntait ban ai ïa ka Transfer Certificate ïa ki khynnah skul, kiba kwah ban leit pule sha kiwei ki skul, ka Federation of Khasi Jaintia and Garo People (FKJGP), Nongpoh Circle mynta ka sngi ka leit ban ïa kynduh ïa ka District School Education Officer (DSEO) bad kaba bat ruh ïa ka kyrdan kum ka Joint Director of School Education and Literacy, Ri Bhoi District ban pynpaw halor kine ki jingeh ba ïa kynduh da ki khynnah skul ha Ri Bhoi.
Ha kane ka jingleit kynduh la lamkhmat da u general secretary u Bah Precious Khymdeit, ha kaba ka seng ym tang ba ka la leit ban ïa kynduh ïa kane ka ophisar ka tnad pule puthi ha Ri Bhoi bad ki la ai ruh da ka dorkhas ban pynpaw halor katei ka phang ba ki khynnah skul ki ïa kynduh jingeh na ka daw ka jingdon ki katto katne ki skul kiba kyntait ban ai ïa ka School Transfer Certificate ïa ki khynnah skul kiba kwah ban pule sha kiwei pat ki skul.
Kumba la pynpaw da u Bah Precious Khymdeit, u la ong ba ka seng ka sngewkmne ba ka DSEO, ka Ruby Z. Das, ka la kular ban shim khia halor kane ka phang kumba la pynpaw da ka seng bad ka la kular ruh ban ai da ki kynja jingthoh sha baroh ki skul ha Ri Bhoi ba ki dei ban pynthikna ba ai ïa ki transfer certificate ïa kino kino ki khynnah kiba kwah ban leit pule sha kiwei pat ki skul pule katkum ka jingkwah ne angnud jong ki.