Ujor ka SRS ha u Myntri ba rem palat ka bai register khyndew ha Ri-Bhoi District

Shillong, Naiwieng 02 : Ka Synjuk ki Rangbah Shnong ka Ri Bhoi District, ka la dawa na ka Sorkar Jylla ba ka dei ban pynduna noh ïa ka dor bai register ïa ki jaka ki puta ha Ri Bhoi District namar ka jingrem palat ka bai rejistar kala buh ha ka jingeh ïa ki paidbah khamtam ha ki thaiñ khappud kiba la phaikhmat pynban sha Assam.
Ka Synjuk ka la buh ïa kane ka jingdawa hakhmat u Myntri ka tnad Revenue Bah Kyrmen Shylla ha kaba ka la aiti ruh da ka dorkhas kaba dawa ïa ka Sorkar ba ka dei ban shimkhia mardor.
Haba ïakren bad ki nongthoh khubor, u Bah PB Sylliang ula ong, “Haba ngi leit sha DC ophis ban rejistar ïa ki jaka ki puta ki jong ngi, ka dor ka la poi sha bneng sha khyndew, I jaka iba ngi thied T.2 Lak, ka bai rejistar pat ka poi sha ka T.2,50,000 ne T.3 Lak…ka rem da ka bai register ïa ka bai jaka”.
Ula pyntip ba u Myntri Sorkar ula pynpaw ba yn sa rah ïa kane ka mat sha ka jingïalang jongka kynhun Myntri na ka bynta ban buh ïa ka dor kaba biang khamtam ïa ki trai ri trai muluk kiba don ïa ka jaka ka puta.
U Bah Sylliang ula ong, kiba bun ki jaka ha Ri Bhoi ki dei kiba shu ïoh pateng na ki kmie ki kpa bad ter ter hynrei ban rejistar ïa ki jaka hap ban lut da ki phew lak.
“Kiba bun ki nongshong shnong ha khappud kim leit shuh ban rejistar ïa ki jaka ki jong ki hapoh ka DC Office Ri Bhoi namar ba la rem palat ka bai rejistar bad kiba bun ki briew ki la leit ban rejistar ïa ki jaka jongki sha Assam namar ba ka Assam ka ai ei bad kim donkam ban siew eiei ïa ka bai rejistar jaka” ula pyntip.
“ Ngi la pynsngew ha u Myntri Sorkar ba lada long kaba lah, ka Sorkar jylla kan pyllait noh ne ban kin shim noh ha ka dor kaba rit khnang ba kan pynshlur ïa ki trai jaka ha khappud ban rejistar ïa ki jaka jong ki hapoh DC Office, Ri Bhoi” ong u Bah Sylliang.