Shillong, Naiwieng, 02 : U Myntri ka tnat Public Health Engineering (PHE) u Marcuise N. Marak ha ka sngi Baar ula pynshai ba ka tnat PHE ka sam da ka umbam umdih kaba khuid sha ki paidbah nongshong shnong jong ka jylla.
Katkum ka jingong jong u, ka tnat ka dang ïakren bad ka Sorkar ha kaba ïadei bad ka jingaiti ïa ka jingkitkhlieh sha ka tnat na ka bynta ban sam ïa ka umbam umdih ha ka Jylla.
“Ngi dang wadlad bad ngi la tyrwa ïa kane (ban aiti ïa ka kam sam um) na ka tnat PHE hynrei ngi dang ïai ap, ong u Marak ha ka jingïakren bad ki lad pathai khubor.
Haba pynpaw ba kane kan dei ka lynti kaba bha tam ban pynthikna ba ka jingsam ïa ka umbam umdih sha ki paidbah kan long kaba khuid ba suba, u Myntri u la ong, “ïa mynta ka jingsam ïa ka umbam umdih la leh da ka Municipal Board ïa kaba kim don jingeh eiei kumno ban pyrkhat nangno yn ïoh ïa ka um, namarkata, lada ka jingsam ïa ka um yn ai lyngba ka tnat PHE yn sa lah ban kham pynjanai shuh shuh.”
Kane ka jingkren jong u, ka long halor ka kaiphod ba la lum nongmuna ïa ka um na ki 44 tylli ki shnong jong ka sor Shillong ha kaba la lap ba kim long kiba ‘bit’ ban dih, katkum ka Food Safety and Standards Authority of India (FSSAI) Standards.
Ïa ka kaiphod jong ka State Food Testing Laboratory Commissionerate of Food Safety, Pasteur Hills, Shillong la aiti da ka Federation of Khasi Jaintia and Garo People (FKJGP) sha u Myntri Rangbah ka Jylla u Conrad K. Sangma ha ka 3 tarik mynta u bnai ba un tuklar mardor halor kane kam bad ban shim ruh ïa ki lad ki lynti.
Haba kylli, u Marak u la ong, “u Chief Engineer u la dep ai ka jingpynshai halor kane ka kam. Hynrei, nga kwah ban pynshai ba manla ka sngi ka tnat PHE shwa ban sam ïa ka umbam umdih ha sor Shillong, ngi ju leh shwa ïa ka test ha Mawphlang Treatment Plant. Ngi tan ïa ka um na wah Umiew, ngi pynkhuid pat ïa ka um ha Mawphlang Treatment Plant bad nangne ngi pynpoi ïa ka um ha ka Top u ha 6 Mer shiteng bad nangne ka don sa kawei ka top um ha 4 Mer kaba ngi pynpoi ïa ka um sha ki top um jong ka Municipal bad sha kiwei kiwei ki top um hapoh ka nongbah. Namarkata, ka um kaba la sam da ka tnat PHE ka long kaba khuid bad kaba long ruh ban dih ban bam.”
U la ong ba um don jingtip eiei halor ka jingshisha na ka jinglum nongnuma ïa ka um ba la leh da ka FKJGP bad hangno la phah ban leh test.
“Hynrei, na ka bynta ban pynhun ïa ki paidbah, ngi la sam ïa ka um kaba khuid sha ki paidbah ka sor Shillong bad lada lap ïa kino kino ki top um jong ka tnat PHE ba ki jaboh lane kim long ban dih ngi shu phah pynkhuid hynrei haduh mynta ka um kaba ngi sam ka dei kaba khuid ban dih,” u la ong.
