Shillong, Naiwieng 02 : Ka Myntri ka tnat ka koit ka khiah ka Kong Ampareen Lyngdoh ka la iathuh ba ki don 7 tylli ki Company kiba la wan shakhmat ban thep Tender naka bynta ban ïoh pynïaid ïa ki kali kit nongpang 108 Emergency Service hapoh Meghalaya.
Haba kren sha ki lad pathai khubor ka kong Ampareen ka la ïathuh ba haka 31 tarik u Nailar, ki nongtrei 108 ki la wan kynduh ban buddien halor ka jingthmu ban pynïaid da ka Company thymmai ïaka 108 Emergency Service hapoh ka Jylla bad haka jingïalang kila pynpaw ba ka sorkar kadei ban pynthikna ban ïada ïaki nongtrei.
“Haka jingïakynduh bad ki nongtrei 108, kila pynpaw bad kila kyntu ïaka sorkar Jylla ba kano kano ka Company kaba wan shimti ban pynïaid ïaka 108 Emergency Service hapoh Meghalaya, ka dei ban ïada ïa ka hok ki nongtrei bad ka dei ruh ban khmih ruh ïaka bha ka miat jong ki” la ong ka Kong Ampareen.
Haba kylli halor ka jingïaid lynti ban ïoh da ka Company thymmai ban pynïaid ïaka 108 Emergency Service hapoh Meghalaya, ka Kong Ampareen kala ong “Haka jingshisha ka tnat ka koit ka khiah ka kyrmen ban pyndep ïa ka jingthep Tender mynta ka sngi hynrei ki don katto katne ki Company kiba la pan por biang ban bishar ïaki jingdonkam”.
“Baroh ki Company kiba thep ïaka Tender naka bynta ban ïoh pynïaid ïaka 108 Emergency Service hapoh Meghalaya, ki kular ban kyntiew ïaka tulop man u snem, ban siew Insurance, ban siew lada ki nongtrei kin ngat haka aksident, ban siew ka bai sumar lada ki ïoh pang” kala ong,
Nalor kane ka Myntri ka tnat ka koit ka khiah ka pyntip ba ki nongtrei ki donkam ban leh ïaki Test ban ïohi ïaki sap ba ki don bad hadien kane yn sa lah ban thepkam ïaki katkum ki sap bad ka jingkot bor ban trei ha ki tnat bapher bapher jong ka 108 Emergency Service.
