Shillong, Naiwieng, 02: Ka Balang Catholic satlak ka pyrthei ha ka sngi Palei ka la kynmaw burom ïa ka sngi jong ki mynsiem kiba la khladnoh na kane ka sla pyrthei bad ban duwai kyrpang na ka bynta jong ki ban poi suk sha dwai u Blei.
Ha kane ka Jyllaniam Bah Shillong, ka Balang Catholic ruh ka la tyrwa ïa ka Mass Bakhuid na bynta ki mynsiem kiba la khlad noh ha kaba u Lyngdohsad jong ka Jyllaniam Bah Shillong u Most Rev. Victor Lyngdoh u la tyrwa ïa ka kñia ka khriam jong ka Mass na ka bynta ki mynsiem ba la khladnoh ha ryngkat ka jingsynran lang kiwei pat ki Lyngdoh Sohblei bad ki hajar ngut ki bahaing hasem jong ki riewngeit ba la tep ha u lum jingtep jong ka Balang ha Laitumkhrah.
Ki bahaing hasem kiba la pynkhuid ïa ki lum jingtep, ki la buh ruh ïa ki syntiew ba la thaiñ kum ki pansngiat bad thang ruh ïa ki mombati kiba la pynthaba khrek ïa u lum jingtep.
Hadien ba la kut ka jinglehniam, ki Lyngdoh Sohblei ki la kyrkhu ïa ki lum jingtep ba la synran lang da ki bahaing hasem kiba pynlong ruh ïa ka jingduwai na ka bynta ki bahaing hasem kiba la khladnoh na kane ka pyrthei shiphang sngi.
U Most Rev. Victor Lyngdoh haba pharia ïa ka Ktien u Blei ha ka jinglehniam u la ong, “kumba la kha ïa u briew sha ka pyrthei ka dei ruh ka bynta jong man la u briew ban leit phai pat na kane ka pyrthei bad na kata ka daw ka dei ka kamram jong manla uwei pa uwei ban im ka jingim kaba bha bad kaba sngewrit na bynta ban pynsngewbha ïa u Blei Trai Kynrad.”
U la ong kumba ha ka Gospel, u Jisu u khot ba kito kiba shitom bad ïa kiba khia ka jingkit ba kin wan sha U kumta ruh ka dei ka kamram jong manla uwei pa uwei uba ngeit bad leit sha u Jisu ban pynjah thait ïalade.
Jowai: Ki paidriewngeit jong ka Balang Catholic ka Jyllaniam Jowai ki la rakhe kynmaw burom ïa ki mynsiem kiba la khladnoh ne ka ‘All Soul’s Day’ da kaba leit buh syntiew ha ki lum jingtep jong ki bahaing hasem kiba la khlad noh.
Ha Parish Jowai, la rakhe ïa kane ka sngi da ka jingleit buh syntiew ha u lum jingtep jong ka Balang Katholik Jowai kaba don ha Moosalangkat ha kaba la pynlong ruh ia ka jingknia ia ka Mass Bakhuid da u Bishop ka Jyllaniam Jowai u Rt. Rev. Ferdinand Dkhar ryngkat ka jingsynran lang jong ki Lyngdoh Sohblei bad ki riewniam.
Ïa kane ka jingbun syntiew la pynlong ruh ha kiwei kiwei de ki Parish.
Ha West Jaiñtia Hills na ka liang jong ka Balang CNI, Jowai ruh ka la kynmaw burom ïa ki mynsiem ba la khladnoh da kaba leit buh syntiew ha u lum jingtep uba don ha Khliehïongriang, Jowai.
