Shillong, Naiwieng 02: Da ki hajar ngut ki p aidbah na kylleng ki bynta jong ka jylla kumjuh na kiwei ki jylla bad wat na shabar ri ki la wan ban sakhi ïa ka Shad Nongkrem jong ka Hima Khyrim kaba la pynkut noh ha kane ka sngi Palei hapdeng ka jingiphuh iphieng ha Iingsad, Smit.
La pynphuh ïa kane ka sngi da ka jingtuid ki rangkynsai bad ki thei samla kiba la wan ban shim bynta ha ryngkat ka riam, ka shad bad ka put ka tem tynrai ha kane ka sngi kut.
Kumba ju leh man u snem, ïa ka shad Nongkrem bad ka Pom Blang la ju pynlong ha u bnai Naiwieng manla u snem kum shibynta na ka jingleh niam ki khun ki hajar jong ka Hima Khyrim ban ainguh ïa ka ‘Lei Synshar’ na ka bynta ka bha ka miat jong u khun u hajar ha baroh ki liang ha ka jingim jongki ba man la ka sngi, la ka long ha ka rep ka riang, ka ïoh ka kot, ka shongsuk shongsaiñ, ka pule puthi bad kiwei kiwei.
Kane ka jingleh niam kala sakhi ïa ka jingwan tuid jong ki nongwan peitkai na kylleng ka Ri-lum Khasi Jaintia, ki briew ba lum jingtip ïa ki kolshor, bad ruh ki nongshangkai pyrthei napoh ka Ri bad nabar ruh kumjuh.
La donlang ruh ha kane ka sngi naduh u Symbud Myntri Rangbah ka Jylla Bah Prestone Tynsong, u Chief Secretary ka Jylla Bah D.P Wahlang, Deputy Commissioner R. M Kurbah, MLA ka thaiñ, Bah Ardent Basaïawmoit, CEM ka KHADC Bah Pynïaid Sing Syiem, ki Executive Member ka KHADC kynthup ïa u DGP ka jylla, u LR Bishnoi bad kiwei kiwei.
Ha ka por janmiet, u Syiem ka Hima Khyriem, Paiem Balajied Sing Syiem ha ryngkat ki Lyngdoh, kila pyndep ïa ka jinglehniam Pomblang ban pynsngewbha ïa ka Lei Synshar-ka Lei Lum Shillong. Ïa kane ka jingainguh la ai ruh sha ki Manbei jong ka Kur Syiem. Kumban shu pynkynmaw, ïa ka Pom Blang bad ka Shad Nongkrem ka dei kaba la pynlong da ki spah snem wat hashuwa ka jingbuh jingthoh kaba dei ha u snem 1931 AD.
Na ka liang u Paiem u la ïathuh ba ka Shad Nongkrem ka la sdang naduh ki spah snem bad ka dei ka jinglehniam ban rakhe ïa ka jingainguh jong ki Khun ki Hajar ka Hima sha u Blei Nongbuh Nongthaw ba un kyrkhu kyrdoh baroh shisnem bad ka dei ruh ka jinglehkmen ban tehsong ïa ka jingïalong kawei jong ka thain kaba hap hapoh ka Hima Khyrim.
U Paiem u la ïathuh ba ha kane ka jinglehniam ba mynta, kila don haduh 288 ngut ki nongshad ba kynthup ïa 118 ngut ki kynthei bad 170 ngut ki shynrang.
