Shillong, Nailur 03: Ka Employment Monitoring Cell jong ka Khasi Students’ Union ha ka sngi nyngkong ka la ïoh ban kynduh ïa ka District Medical & Health Officer (DMHO) ka East Khasi Hills District ban ujor halor ka jingkynrum kynram ka jingpynlong eksamin thung kam ha ka district na bynta ka AYUSH Hospital kaba hab hapoh ka National Ayush Mission (NAM).
Ka District Ayush Society (DAS) ka lah pynlait paidbah ïa ki post bapher bapher ha 13 tarik u Rymphang, 2024. Hadien ba ki samla ka jylla ki lah dep apply ïa kine ki post bapher bapher, la pynlong ïa ki eksamin na ka bynta kine ki post naduh u bnai Jymmang bad ïa ki resot dang shu dep mih ha kine ki sngi.
Ka Seng ka dap da ka jinglynngoh hadien ba ka ïohi ïa ka resot jong ka District Programme Manager. Na ka bynta kane ka post District Programme Manager ha East Khasi Hills la pynlait tang 1 (kawei) ka post, ladon 20 (arphew) ngut kiba lah apply bad tang kine ki 20 ngut hi ba lah bit ban thoh ïa ka eksamin ba lah pynlong ha 29 tarik u Jylliew, 2024 katkum ka Notification ba lah pynlait na ka office jong ka DHMO. Hynrei ha ka por ba pynmih ïa ka resot jong kane ka eksamin la lap ba na ki 5 (san) ngut ba lah pass ïa ka eksamin (written examination) ban ïaleh ïa ka document verification ne ka personal interview, don 2 (ar) ngut na kita ki 5 bym shim lah mih kyrteng hapdeng kita ki 20 ngut ba lah pynlait katkum ka notification jong ka office DMHO. Kane ka pynsuba ïa ka Seng bad ki paidbah baroh hi ba ka don eiei sha lyndet ba mih kyrteng jong ki briew ki bym shim la apply ïa ka kam, bym shym lah don kyrteng ha ka list jong kita ki 20 ngut, hynrei la paw kyrteng pat ban ïaleh ïa ka document verification.
Ka Seng ka lah pan jingpynshai na ka DMHO kaba dei ruh ka Member Secretary hapoh ka District Ayush Society, EKH. Na ka liang ka DMHO ka lah pyntip ba lah thung ïa u Nodal Officer ba kyrpang ban peit halor ka jingthung kam bad ka jingleh eksamin bad ka kam shim tip bniah halor kane ka bynta hynrei ka lah kular ba kan wad bniah halor kane ka bynta bad yn sa pyntip bad pynshai ïa ka Seng.
Ka Seng ka ju lap na ka por sha ka por ïa kum kine ki jingthurmur ha ki jingthung kam ha ki post bapher bapher. Ka jingsuba na ka liang ki paidbah ha kine ki sngi ki long ka jingthung kam hapoh ka jylla kam shym long kaba khuid hynrei ka long tang na bynta ki khun ki kti ki longheh longhaiñ. Ka Seng ka kwah ban ban jur ba kum kine ki jingthung kam kaba bym khuid kan dang ïai jia katba ka Sorkar kam pat shim pyntreikam ïa 20 tylli ki mat jingdawa jong ka Seng ba lah buh na bynta ka MPSC. Kine ki mat kim dei tang na bynta ka MPSC hynrei ïa baroh ki tnad treikam jong ka Sorkar jylla baroh kawei bad lada pynurlong lut ïa kine ki mat ka Seng ka ngeit ba kan wanrah shibun ïa ka jingkhuid ha ka thungkam ha ki tnad sorkar bad kan pyrkhing ïa kino kino ki ba mut leh tuh.
Ka Seng ka bitar ruh ba wat lada katto katne ki MLA ka jylla ki lah ïakren ha ka Dorbar thaw aiñ ba la dep halor ki mat ban wanrah ïa ka jingthung kam kaba khuid hynrei ym shim ïohi ïa kano kano ka resolution kaba pura halor kane ka bynta bad kiei kiei baroh ki sah tang ha ka jingïakren. Ka Seng ka maham jur ïa ka Sorkar ba lada ka Sorkar ka sngap jar halor ki 20 tylli ki mat jingdawa jong ka Seng, ka Seng ha ki sngi ki ban wan kan wanrah ïa ki jingïakhih bapher bapher.
