Shillong, Nailur 03: Ka kaiphod CAG halor ka solid waste management ha ki thaiñ sor jong ka Meghalaya ka pynpaw ba ka JMB ka hap ban pynlut haduh T 33.36 lak, ha kaba na kane kumba T. 19.58 lak lah dep ban siew bad ka pisa kaba sah jong ka 11 tarik u Jymmang 2022 ka long T. 13.78 lak ban bret ïa ka ñuit ha ka jaka ki riew shimet naduh u Kyllalyngkot 2022 haduh u Nailar 2022.
Na ka liang chairman, ka JMB u la phah ruh ha u bnai Nailar 2022 ïa ka jingtyrwa sha u Myntri ka Tnat Pynroi kaba wad ïa ka lad jingïarap pisa kaba long T. 60.80 lak kaba la pyndonkam na ka bynta ban bret ïa ki ñuit naduh u Nailar 2022 haduh u bnai Lber 2023, ong ka kaiphod.
Ka kaiphod ïa ka ong ruh ba ïa kane ka kam theh ñuit kaba khlem ka juk saïan la leh ha Jowai bad ki jaka ba marjan kaba hapoh ka Jowai Municipal Board bad Jaiñtia Hills Autonomous District Council ka pynpaw ba kam shym pynpaw ïa ka jingdon ki rukom treikam jong ka rukom lum ïa ki ñuit ha ki jaka ba long sor hapoh West Jaiñtia Hills.
“Ki sienjam ba shi por ba la shim da ka tnat treikam ka sorkar ban bret ïa ki ñuit, bad ka jingbym lah ka sorkar ban ïoh ïa ki jaka theh ñuit ka la wanrah ïa ka jingbret ïa ki nuit ha ki jaka bym dei,” ong ka kaiphod.
Ha ka por ka Exit Conference (u bnai Jymmang 2023), ka tnat ka la ïathuh ïa ka jingbret ïa ki ñuit la theh ha ki jaka bym shym la pyntip.
Na ka liang ka tnat ka la pyntip ba ka jaka theh ñuit la dep ban ithuh hapoh Jowai, bad ka Environment Impact Assessment (EIA) ka la ong ba ka jingithuh ïa ka jaka theh ñuit ha Jowai ka la don ha ka lynti ban ïoh ïa ka jaka.
Kumba ka long mynta ki bor pynïaid shnong ha West Jaiñtia Hills ki la aiti ïa ka jingtyrwa na ka bynta ka jaka ha ka jinglut kaba long kumba T 5.65 klur ban pyndonkam na ka bynta ka jaka theh ñuit kaba pura sha ka sorkar jylla kaba khlem da mynjur haduh mynta.
Naduh ba la pynmih ïa ka Jowai Municipal Board (JMB) (ha u Naiwieng 1995), ïa ka jinglum ïa ka ñuit la theh ha ka jaka barim jong ka JHADC kaba don ha Mynkjai.
Hadien ba la ïohpdiang ïa ka jingujor ha u Nailur u snem 2015 na ki 12 tylli ki Dorbar Shnong ka Joint Action Committee (JAC), West Jaiñtia Hills District, JHADC la khang noh ïa ka jaka bret ñuit ha u Naiwieng 2015.
Hynrei kham hadien ïa ka jaka theh ñuit kaba thymmai ka la don mynta sha kawei pat ka liang jong ka Mynkjai.
Ka don ruh ka jingïamynjur hapdeng ka JMB bad ka JHADC ha u Nailar 2017 na ka bynta katei ka jaka theh ñuit kaba thymmai tat haduh ba la ïoh shna ïa ka jaka theh ñuit kaba bha.
La ong ba ka la don ruh ka jingpyrshah ha u bnai Lber 2021 pyrshah ïa ka jaka theh ñuit kaba thymmai bym long katkum ka juk stad hapoh ka shnong Mynkjai da ki shnong bad ki samla pule ha kaba na ka liang ki bor pynïaid ki la mynjur ban pyndonkam shipor na ka bynta ka lai bnai kaba la long naduh ka 14 tarik u Nailar, 2021.
Ha kane ka jingpyndonkam kaba shipor kaba long tang 3 bnai na ka liang ka JMB ka la ithuh ïa ka jaka kaba don kumba 136.60 acre ha shnong Mookabeng kaba la long trai da Baiamonlang Shylla kum ka jaka theh ñuit kaba shipor.
Ha ka 8 tarik u Naiwieng, 2021, na ka liang deputy commissioner, West Jaiñtia Hills la pynmih ïa ka hukum sha ka JMB ban sdang theh noh ïa ki ñuit ha katei ka jaka kaba shipor hapoh ka shnong Mookabeng bad ba kadei ban ïasoi soskular bad u trai ka jaka u Bah Baïamonlang Shylla.
Hadien kane ka jingïamynjur kaba ha ka 9 tarik u Naiwieng, 2021, ka JMB ka la sdang ban theh ïa ki ñuit naduh ka 15 tarik u Naiwieng, 2021.
La lap ruh ka jingïalang kaba la long ha ka 21 tarik u Nohprah, 2021 hapdeng ka JMB bad ki dkhot ka shnong ba kine ki la pyrshah ïa katei ka jaka theh ñuit kaba shipor na ka daw ba ki tieng ba ka rukom bret ñuit kam long katkum ka juk saïan kaba lah ban lam sha ka jingeh na ka jingjaboh ka lyer bad ka um bad ka ban ktah ïa ka wah Umngi kaba don hajan ka jaka, nangta ki jaka rep kba, ki tyllong um bad ka koit ka khiah jong baroh.
Na ka liang ka Elaka Nartiang Coordination Committee (ENCC) ka la pynpaw ruh ïa ka jingkdew ba kane ka rukom theh ñuit kan ktah ïa ka khyndew bad ka shnong.
Kane ka jingpyrshah ki dkhot ka shnong ka la wanrah pynban ïa ka jingpynkheiñ ïa ka suk ka saiñ haduh ba la hap ban pynjari da ka kyndon 144 CrPC ha ka 23 tarik u Nohprah, 2021.
Halor kane, hadien ha ka 3 tarik Kyllalyngkot, 2022, ki 4 tylli ki shnong bad ka ENCC ki la ïamynjur ban wengnoh ïa ki jingpyrshah bad ki la shah biang ban theh ïa ka ñuit haduh ka 5 tarik u Rymphang, 2022 lada ka sorkar ka pyni ïa ka dak ban tei pynbha ïa kane ka jaka theh ñuit.
Ka la don ruh ka prokram ai jinghikai hapoh kitei ki 4 tylli ki shnong ha ka 31 tarik Kyllalyngkot, 2022 bad ha ka 2 tarik u Rymphang, 2022.
Ïa kane ka kam ba la leh da ka deputy commissioner ne da ka JMB kam shym la don hapoh ki kaiphod.
La ong ba la pynlong ruh ïa ka jingbishar paidbah ha ka 4 tarik u Lber, 2022.
Hadien ka jingpyrshah ban theh ïuit ha shnong Mookabeng da ka ENCC, ka JMB ka la lah ban theh ïa ki ñuit ha ka shnong Mookabeng tang haduh ka 5 tarik u Rymphang, 2022.
Naba ka JMB kam lah shuh ban bret ïa ka ñuit ka la don ka jinglum ïa ka ñuit napoh ka ïew bad ki ïing ki sem ki briew kaba la lang ha ka jaka sor haduh jan 2 bnai kaba la pynlong ruh ïa ki paidbah ban pyrshah, kynthup ïa ki nongshong shnong bad ki sengbhalang.
