Ujor ka JWC sha ka Human Rights halor ka ‘public hearing’ ba la pynlong ha Wahiajer,EJH

Khliehriat, Risaw 24 :Ka Seng Jaiñtia Women Council (JWC), CEC ka la phah da ka jingujor sha u Chairman jong ka Human Rights Commission, Meghalaya ban pynpaw ïa ka jingpyrshah jur ha kaba iadei bad ka jingpynlong ïa ka jingpynsngew paidbah ne ‘public hearing’ ha ka shnong Wahiajer, East Jaiñtia Hills District myn ha ka 18 tarik u Risaw 2024.
Ka Seng ha u kyrwoh lyngba ka GeneralSecretary, ka Kong Nica L Lapasam, ka la ong ba hadien ba ki bor pyniaid District ki la pynbna ba kan don ka jingpynsngew paidbah ha ka shnong Wahiajer, EJH ha ka 18.10.2024,halor ka jingthmu ban wanrah ïa ka karkhana dewbilat jong ka Meghatop Cement ha kane ka jaka, kumta ruh ka Seng ka la phah ïa ka aplikeshon ha ka ophis u Deputy Commissioner ka EJH bad pan jingbut ban shah ïa ki ba kin iashim bynta bad halor kane ka jingpynsngew u DC u la pynthikna ba ki lah ban iashim bynta bad ban pynpsaw ïa ka jingsngew ka jong ki.
“Hynrei ka long kaba sngew lyngngoh namar la khanglad ïa ngi ba ngin rung sha katei ka jaka ba pynlong ïa ka jingialang pynsngew paidbah, kata hadien ba ngi la shah khanglad noh ha ki paidbah bad ki bor pulit kiba rah ryngkat ki dieng lathi,” ong ka nongialam ka Seng.
Ka JWC ka la ong ruh ba ka la don ka jingdheng kali kaba jur bha ha Umtyra point ha kaba ki bor district ki la pynlong ïa ka jingtalasi tang ban pynslem kai ïa ka por ban khanglad ïa ki ba kin poi sha katei ka jingialang ha ka por kaba biang, hynrei kane ka jingleh jong ki bor District ka pynpaw ruh ïa ka jingartatien ba ka lah ban dei ka nongsylla ban khanglad ïa ki ba kin ioh ban pynpaw ïa ka jingsngew ka jong ki ha katei ka jingïalang.
Nalor kata ka Seng ka la ong ba kane ka jingkhanglad jong ki bor District ba kin ioh ban leit pynsngew halor katei ka jingthmu ban wanrah ïa ka karkhana Meghatop Cement ka pynpaw shai kdar ba ka don ka jingthmu kaba sha lyndet bad ym na ka bynta ka bha ka miat bad ka jingbit jingbiang jong ki paidbah.
“Kane ka jingleh ka kaba beaiñ jong ki bor pyniaid District ka la pynkheiñ halor ki hok ki jong ngi, ki hok ban pynpaw bad pynsngew katkum ki riti synshar khadar jong ka Ri India.Kane ka pyni ruh ba ka dei ka Sorkar kaba leh donbor namar ka jingpynkheiñ ïa ki hok longtrai jong ngi,” bynrap ka nongïalam ka Seng.
Kumta na ka liang ka Seng ka kyntu jur ïa ka jingtuklar lem jong ka Human Rights Commission ha kaba iadei bad kane ka bynta bad khnang ban pynioh ïa ka jingbishar hok.