Ïoh jingïarap ka skul Jalaphet Bri Sutnga L.P. EJHD ban shna ïa ki kamra

Khliehriat iaiong 13: U Myntri ka sorkar jylla, uba dei khmih ïa ka pule puthi, u bah Lahkmen Rymbui mynta ka sngi ha ka jingjurip jong u ïa ka skul Jalaphet Bri Sutnga, Government Lower Primary (LP) School East Jaiñtia Hills District u la pynbna ïa ka mang tyngka kaba T. 40 lak tyngka na ka sorkar na ka bynta ban shna shuh shuh ïa ki kamra klas khnang ba kan kham kylluid ka jaka ban nym khapngiah than kumba la pynpaw da ki dkhot jong ka School Managing Committee bad na ka bynta ka skul Jalaphet Upper Primary School pat kaba don lang hajan kane ka LP School, u myntri sorkar u la pynbna ïa ka mang tyngka kaba T. 11 lak tyngka na ka bynta ban shna ïa ka kamra ban shet jingshet bad ban buh tiar.
Haba kren ha ka jingïalang u la ai ka jingiaroh ïa baroh ki tnat treikam kynthup ruh ka MLA, ka thaiñ, ka kong Santa Mary Shylla, ki nonghikai, ki khynnah skul, ki dkhot ka SMC, kiba ai ka jingiatreilang, u ai ka jingiaroh ruh ïa ki kmie, ki kpa kiba dang iai bteng ban ai ka jingshaniah bad kyrshan lang ban pynkhlaiñ ïa ka pule puthi da kaba ki la phah ïa ki khun jong ki sha ki skul, ha kaba katkum ka statistics, ka jingpynrung kyrteng ïa ki khynnah ha kane ka skul ha Jalaphet ka kiew irat bha bad kadei ka thaiñ kaba kiew bha khamtam ha ki kyrdan Lower Primary Schools, u la ong ba kane ka dei namar ba nongshong shnong ki dang don ka jingshaniah ha ki skul sorkar bad ha ki nonghikai bad kane ka jingjurip ka dei ruh halor ka jingbuhthong ka sorkar ban pynbit pynbiang ïa ki iing skul khamtam ki kamra klas na ka bynta ka jingbit jingbiang ki nonghikai bad ki khynnah ha ka rukom ai jinghikai, u la kren ruh halor ka jinglah ki nonghikai ban pynbit pynbiang ha kaba ïadei bad ka jingpynrung kyrteng ïa ki khynnah bad ong ba ki don ki skul kiba don tang khyndiat ki khynnah skul bad ki nonghikai pat ki don bun.
Ha kaba ïadei bad kane ka skul Jalaphet Bri Sutnga, Government Lower Primary (LP) School, u bah Lahkmen Rymbui u la ong ba ka la i donkam ban buh shuh shuh ki nonghikai bad u la bthah ïa u Sub-Divisional School Education Officer (SDSEO), East Jaiñtia Hills District uba la don lang ha kane ka jingwan jurip ba un pynkloi noh ïa ka kam ban thung nonghikai shuh ha kane ka skul.
Shuh shuh, u la bynrap da kaba ong ba ki nonghikai ha ki skul sorkar ki dei kiba la ioh ki jinghikai ba paka bha bad kiba la biang ruh ki kyrdan pule, u la ong ruh ba ka long kaba donkam bha ba ki nonghikai lem bad ki kmie ki kpa jong ki khynnah skul ba kin don ka jingkitkhlieh ban pyntikna ïa ka jingwan poi tista ki khynnah sha skul bad ruh ba ki khynnah kin ioh ïa ka jinghikai kaba paka na skul kaba ki ong ka quality education, namar na ka liang ka sorkar ruh ka ju bthah ba dei ban pynlong ar sien shi snem ka jingialang jong ki nonghikai bad ki kmie ki kpa ha baroh ki skul khnang ban dup lah ban peit bniah ïa ka jingkiew ka pule puthi, ban ioh ban pynpaw ïa ki jingeh ha kaba ïadei bad ka jingsam ïa ka jingnang jingstad lane kata ka teaching-learning process.
Na ka liang ka MLA Sutnga-Saipung MLA, ka kong Santa Mary Shylla, ka la ai ka jingiaroh ïa ki nonghikai jong katei ka skul namar ka jingtrei shitom jong ki bad jingshim khia ïa ka kam kaba la ju pynlong ia ki nongshong shnong ban shaniah ïa ka skul bad kane ka kyntiew ruh ïa ka jingdon ki khynnah ha skul, ka la kren ruh halor ka jingdonkam ka stad ka tip khamtam ha ki shnong kyndong bad ong ba na ka liang ka sorkar jylla ka jingshimkhia bha ban kyntiew ïa ka pule puthi hapoh ka jylla, na ka liang ka MLA ka la pynbna ïa ka mang tyngka kaba T 20 lak tyngka kaba wan lyngba ka skim jong ka District Mineral Foundation Scheme (DMF) na ka bynta ban shna ïa ki kamra klas bad ka la ai ruh ka jingkhublei ïa ka sorkar kaba la theh jingiarap T 40 lak tyngka ïa kane ka skul ha shnong Jalaphet.
Katei ka jingioh jingiarap jong katei ka skul ha Jalaphet ka dei ruh ka jingbuddien jong ki dkhot jong ka School Management Committee (SMC), Jalaphet Bri Sutnga, Government Lower Primary (LP) kiba la wad ki lad ki lynti ban ioh ban shna shuh shuh ïa ki kamra klas khnang ba kan nym long khapngiah than ïa ki khynnah skul bad kumjuh ruh ïa ki nonghikai kiba hikai ïa ki khynnah bad ka SMC ka la shim khia ban wad ki lad ki lynti dei namar ba ha kane ka skul ki la don bun ki khynnah bad ka jingpynrung kyrteng ïa ki khynnah ruh ka la kiew bha haba ïanujor bad kiwei kiwei ki LP school kiba don hapoh ka jylla.
Kiba la ai don ryngkat lang ha kane ka sngi ki kynthup ruh u Sub-Divisional School Education Officer (SDEO), East Jaiñtia Hills District, u bah O. Sumer, ka Head Teacher, Jalaphet Bri Sutnga Government Lower Primary (LP) School, ka kong Diona Syrti, u Chairman School Management Committee (SMC), u bah Langki Bareh, ki nongpyniaid shnong na Jalaphet, ki dkhot ka SMC, ki nonghikai lem bad ki khynnah skul.