Ujor ba ym pat leh eiei ka sorkar ïa ka surok ba la pynjulor ha EJHD, ong ka KSU EJHD
Shillong, Nailur 08: Ka Seng Khasi Student’s Union ka East Jaintia Hills District ha ka sngi baar ka la ujor da ka ejahar pyrshah ïa u Deputy Commissioner, u Superintendent ki Pulit ka East Jaiñtia Hills District bad ïa ki ophisar ka Meghalaya State Pollution Control Board ha Crime Branch Police Station Shillong.
Ïa kane ka ehjahar la soi da u samla Chibaitlang Rymbai Organising Secretary Shawari Ryngkhlem Sport Secretary bad u Emmon Chynrmang Education Secretary. Ïa kane ka ejahar kaba la wan ai mynta ka sngi ha Crime Branch Police Station la synran lang da ki nongshong shnong ka Shnongrim.
U samla Streamly N. Suchen u president ka KSU East Jaiñtia Hills District haba kren ha ki lad pathai khubor u la ong ba ki paidbah nongshong shnong napoh ka Elaka Nongkhlieh kila wan ban ujor ïa ka ejahar ha kaba ïadei bad ka jingpynsngap paidbah kaba la long ha ka 30/Naitung/2026.
Ha katei ka sngi kumba la ïa tip paidbah ka la don ka jingshah ka wang maw bad ka jingtih ïa ka surok hynrei na ka liang jong ka sorkar haduh mynta kam shym la leh eiei dei halor kane ki la wan khnang sha kane ka Crime Branch Police Station Shillong ban buh ïa kane ka ejahar. Ka jingujor ka long pyrshah ïa kito ki briew kiba don kti ha katei ka kam.
U samla K. S Suchiang General Secretary ka East Jaiñtia Hills District u la ong ba kine kiba la wan ki dei ki nongshong shnong ka Shnongrim ka Elaka Nongkhlieh, ka jingbuh ïa ka jingujor ka long ba naduh ka 30/Naitung/2026 bad 31/Naitung/2026 kaba ki thmu ban leit ïa shim bynta ka jingpynsngap paidbah ka Shree Cement ha Lum Syrman hynrei ha ka miet 30 tarik hi kila shah khang lynti.
U General Secretary u la ong ba ynda ki poi ha ka shnong Umpleng ki la shah khang lynti bad shah ka wang lyer pynsat khmat bad kila shah kawang maw bad ka la mih ka huri hura, ka jingkylli kaba ki buh ka long balei ka sorkar kam shym la kem ïa kito kiba donkti lada dei ki pulit ne ki riew paidbah kiba kawang maw ha ka step 30 tarik ha kaba bun tylli ki kali ki la julor bad kiwei kiwei pat ki jingjia.