Uba dawa ban shong Dorbar haduh shiteng synñia, u la jah klep tang shiteng sngi: Paul

Shillong, Nailar, 28: U Myntri ka tnat Jngohkai Pyrthei ka Sorkar Jylla u Bah Paul Lyngdoh uba long ruh u nongïalam ka UDP ha ka sngi Balang u la takraiñ tyngeh ïa ki seng saiñpyrthei kiba shong ha ka Liang Pyrshah namar ka jingbym lah ban ïashim bynta ha ka jingïatai bad ïa jingïathir nia hapoh ka Ingdorbar Thawaiñ wad hapdeng ka jingdawa ban pynjlan ïa ki sngi pynlong ïa ka Dorbar Synrai sa katto katne sngi.
Ha ka jingïakren bad ki lad pathai khubor, u Bah Paul u la pynpaw ka jingkyndit ban ïohi ha ka jingïatai ha ka Short Duration Discussion halor ka jingkiew shaphang jong ki kam jngohkai pyrthei ba la wanrah da u dkhot na ka Liang Synshar u Bah Mayralborn Syiem, ki don tang san ngut ki MLA kiba la ïashim bynta tang na ka Liang Synshar.
U Bah Paul haba shim ïa kane ka jingjia kum ka jingïasylla, u la ong, “nga dang pyrkhat bad nga dang khmihlynti ba ki dkhot na ka Liang Pyrshah khamtam na ka Voice of the People People (VPP), kiba la pynpaw ba dei ban pynjlan ïa ki sngi shong dorbar bad kiba la dawa ruh ba ngin pynjlan ïa ki kynta shong dorbar manla ka sngi, hynrei kine kijuh ki dkhot kiba pep ha ka jingïatai bad kim shym la ïashim bynta ha ka jingïatai nia bad kane ka dei ka bym pat ju jia koit.”
Shuh shuh une u nongïalam ka UDP u la kdew ruh halor ka jingbym lah jong ka Liang Pyrshah ban wanrah ïa ka Cut Motion ha ka jingthep vote halor ka Supplementary Demands for Frants hapoh ka Ingdorbar Thawaiñ.
“Ka long shisha kaba phylla shibun. Ha ka por ba thep vote halor ka Supplementary Demands for Grants kumba ju long ki dkhot na ka Liang Pyrshah ki ju wanrah ïa ki Cut Motion hynrei mynta ka sngi la wanrah haduh 23 tylli ki Supplementary Demands for Grants bad la mynjur da ka ïingdorbar khlem da wanrah ïa kino kino ki Cut Motion da ki dkhot na ka Liang Pyrshah,” u la ong.
Haba kylli, u Bah Paul u la ong, “Phin hap ban tohkit na ki. Ki (VPP) dei kiba ju kren bha ba dei ban pynjlan ïa ki sngi shong dorbar bad ïa ki kynta shong dorbar- uwei na ki lei lei u ong ba ngi dei ban shong (dorbar) haduh shiteng synñia hynrei tang shiteng sngi ki la jah klep.”
“Haoid ka long kaba dei namarba ha ka khep banyngkong ki nongthep vote ki la ïashim bynta ha ka elekshon da kaba khmihlynti ban ïohsngew ïa ka sur jong ki paidbah hapoh ka Ïingdorbar. Hynrei, ki jingkhmih lynti ki long markhongphong, kim shym la ïashim bynta ha ka jingïatai ha ka Short Duration halor ka Tourism lymne ha kaba mynjur ïa ki Supplementary Demands for Grants ïa kiba ngi khmihlynti ba kin wanrah ïa ki Cut Motions,” la kynthoh u Bah Paul.
Ha ka sngi sdang jong ka dorbar, u MLA ka VPP na North Shillong u Bah Adelbert Nongrum u la wanrah da ka Amendment Motion ha iingdorbar ha ka sngi Thohdieng jong ka taiew baladep da kaba dawa ba dei ban pynjlan shuh shuh ïa ki sngi ym tang ar ne lai kynta.
U la ong ba ki san sngi kumba la mynjur da ka Business Advisory Committee (BAC) ka long kaba lyngkot palat bad ki dkhot jong ka Iingdorbar kin ym lah ban leh hok ïa ki mat kiba donkam ban shimkhia kyrkieh. Hynrei, ïa ka Amendment Motion la kyntait da ka Iingdorbar.