Shillong, Nailar, 28: Ki Pulit jong ka East Jaiñtia Hills District ki la lap ïa kawei ka metïap shynrang ba la sdang pyut ha kawei ka bri rep kwai ha ka shnong Dona Bhoi, East Jaiñtia Hills District, kaba jngai kumba 1.5 kilometer na khappud jong ka Indo-Bangladesh.
Ïa ka met la lap ha ka janmiet lah Sngi U Blei bad la ithuh ïa ka kyrteng lyngba ka passport jong ka ri Bangladesh Passport kum u Ishaque Ali Khan Panna, uwei na ki politishian ba pawkhmat bha ha ka ri Bangladesh.
U Superintendent of Police jong ka East Jaiñtia Hills u Giri Prasad M u la pynthikna ba ïa ka met jong u Panna, uba dei u General Secretary barim jong ka Bangladesh Chhatra League (BCL) bad u dkhot bapawkhmhat jong ka Awami League na Pirojpur District, la pynthikna hadien ba la leh ïa ka post-mortem examination ha Civil Hospital Khliehriat.
“Ïa ka met la buh ha ka jaka buh metïap ha Hospital na ka bynta ban pyndep ïa ki kam ba dang sah,” u la pyntip.
U Panna, u dei uba la phetrieh hadien ka jingkhyllem jong ka Sorkar Awami League, bad la ïathuh ba u la ïap katba u dang pyrshang ban wan phet sha ka ri India. Ka khubor ba la ïohlum ka la ïathuh ba u don ka jingpang kyndeh shadem katba u dang pyrshang ban jam ïa ka khappud Indo-Bangladesh hajan ka jylla Meghalaya. Hynrei, la suba ba u lah ban dei uba don bynta ruh ha ka jingïather kuli bad ki shipai Border Guard Bangladesh (BGB), la ïathuh ka thymmei khubor.
Kawei pat ka jingjia, ha kane kajuh ka sngi, sa kawei ka metïap la lap najan ka iingsah jong u Saddam, u khun jong u Raffikul Islam, ha ka shnong Donachera, Kanaighat, Sylhet District, kaba jngai kumba 400 mitar na khappud.
Ki heh ophisar na ka tnat shipai Border Security Force (BSF) Meghalaya Frontier ki la ïathuh ba kam shym la don kano kano ka jingrung tuh shapoh u pud u sam jong ka ri India. “Ngi la ïoh ïa ka kaiphod halor ka jinglap ïa ka metïap sha u pud u sam jong ka ri Bangladesh. Ngin ïai bteng ban pynkhlaiñ ka jingpahara ïa ka khappud jong ka ri,” ong u heh shipai BSF.
U Saddam u dei uba dang don hapdeng ka jingshah tohkit halor ka jingkynnoh ba u la jam be-aiñ sha shiliang pud ryngkat bad u nongbishar ba la shongthait jong ka Ingbishar Supreme Court u AHM Shamsuddin Chaudhary Manik, ha kaba la ong ruh ba u la kit lang ïa ka pisa kaba kot 40-50 lak tyngka ka pisa Bangladesh. Ka khubor ka ïathuh ba u Saddam u lah ban dei u nongshet kylla ïa u nongbishar, bad ka jingkylli mynta ka mih ruh halor ka jingïadei bad ka jingïap jong u Panna.
Ki bor ba dei peit ki la pynlong ïa ka jingtohkit kaba bniah halor ka jingïadei jong u Saddam, ka jinglap ïa ka metïap, ka jingpyrshang jong u nongbishar ban jam sha shiliang pud.
Katba ka jingtohkit ka dang ïaid shakhmat, ki mih ki dak jingkylli kiba bun haor ka jingïap jong u Ishaque Ali Khan Panna.
