Khliehriat, nailar 29: Kum ka jingrakhe ïa ka National Sports Day, ka ophis jong ka District Sports Officer, East Jaiñtia Hills District ha ryngkat ka jingiatreilang bad ka ophis jong u Deputy Commissioner, East Jaiñtia Hills District, mynta ka sngi ki la pynlong ïa ka jingïamareh marathon kaba la sdang naduh ka por 6:30 mynstep ha kaba ka jingïamareh ka la sdang naduh ka ophis ba rim jong u Deputy Commissioner shaduh PHC Rymbai bad phai biang sha ophis Deputy Commissioner ba rim bad ha shwa ban sdang ka jingïamareh la pyllait ïa ka lama marathon da u Deputy Superintendent of Police, East Jaiñtia Hills District, u bah S. Paslein, MPS.
Kiba la ïa don ryngkat lang ha kane ka sngi ki kynthup ka District Sports Officer, East Jaiñtia Hills District, ka kong S.M Rapsang.
Ha kane ka jingïamareh marathon kaba dei ha ka thup jong ki shynrang, u Knerlang phawa u la long u lah duh bad khur ïa ka prize, u Rishan Meki Ryngkhlem, u la wan ba ar bad u Sting Phawa u la wan ba lai, katba na ka liang ki kynthei ka Phyrnai Kyndait ka la long ka lah duh bad khur ïa ka prize ha ka kyrdan ba nyngkong, ka Rosy Sana ka la wan ba ar bad ka Lamsuk Phawa ka la wan ba lai.
Ha kane ka jingiamareh marathon la wan ban ïa shim bynta da ki nongshong shnong na East Jaiñtia Hills District khamtam ki samla.
Kiba ioh ïa ka first prize ha kane ka jingïamareh marathon ki la khur ruh ïa ka song pisa kaba T 7000 hajar tyngka, kiba wan ba ar ki ioh T 5000 tyngka bad kiba wan ba lai ki ioh T 3000 tyngka.
Hadien kane ka jingiamareh marathon ka la don ruh ka jingialehkai Volleyball match ba la iakhuh hapdeng ka kynthun ialehkai na East Jaiñtia Hills Team bad ka kynhun kaba na Diengshynrum bad la ialehkai ha madan ha Diengshynrum.
Ïa ki prize kiba jop ha ka marathon bad ha ka volleyball la sam da ka Additional Deputy Commissioner, East Jaiñtia Hills District, ka kong J.U Kharpuri.
Kane ka jingrakhe ïa kane ka National Sport Day ka dei kaba ju pynlong man la u snem ban kynmaw ne rakhe ïa ka sngi kha jong u Major Dhyan Chand, uba dei u khlur ialehkai hockey jong ka ri India uba la kha ha kane ka sngi 29 tarik u nailar 1905, kumjuh ruh kane ka jingrakhe ïa kane ka National Sports Day ka long ruh kum ka jingai jingpynshai sha ki paidbah ba kin sngewthuh ïa ka jingdonkam ban ialehkai sport, ka ba pynsting ïa ka met ka phad bad ruh ka long kum ka jingkynmaw burom ïa baroh kito ki nongialehkai sport kiba la noh syniang da ka jingialehkai sport jong ki sha ka ri baroh kawei.
